Time Magazine 100 most influential people 2021-ah India mi pathum an lang

American news magazine lar, Time chuan kum tina a tih ṭhin angin khawvel puma mihring, huhang nghah zual 100, 100 most influential people (2021) a tlang chhuak leh a, Nilaini kha he list hi a tichhuak a ni. Time 100 most influential people of 2021-ah hian India mi pathum- prime minister Narendra Modi, West Bengal chief minister Mamata Banereje leh Serum Institute of India CEO Adar Poonawalla te an tel.

Time Magazine hian '100 most influential people 2021' hi category parukah- Pioneers, Artists, Leaders, Titans, Icons leh Innovators-ah te a ṭhen hrang a ni.

Leaders category-ah Modi leh Mamata
Prime minister Narendra Modi leh West Bengal chief minister Mamata Banerjee chu Leaders category-ah an lang. He category-ah hian US president Joe Biden, China president Xi Jinping, Donald Trump leh US vice president Kamala Harris-te pawh an tel a ni.

Chhinchhiah tlak ve deuh chu, kumina Time Magazine-in mi huhang ngah 100 a thlan chhuah zingah hian Taliban leader leh co-founder Mullah Abdul Ghani Baradar pawh a tel a, a ni pawh hi Leaders category-ah a tel.

Abdul Ghani Baradar hi Afghnistan-a Taliban sorkar lailawkah deputy prime minister a ni mek bawk a, an sakhaw hruaitu a ni bawk.

Kumin Time Magazine-in mi huhang ngah 100 a thlan chhuah zingah hian Taliban leader leh co-founder Mullah Abdul Ghani Baradar pawh a tel

Pioneers category-ah Adar Poonawalla
Serum Institute of India CEO Adar Poonawalla chu Pioneers category-ah a lang. He category-ah hian Billie Eilish pawh a lang a ni.

Myanmar-a sipai rorelna duh lotu hmeichhe pahnih- Esther Ze Naw Bamvo leh Ei Thinzar Maung chu 100 most influential people of 2021-ah hian an lang bawk a, anni pawh hi Pioneers category-ah an lang.

Esther hi Kachin Peace Network hruaitu a ni a, Rohingya buaina chungchangah pawh khan remna leh muanna a awm theihna tura hmalatute zinga mi a ni. Ei Thinzar hi politician leh activist a nih bakah National Unity Government-a deputy minister ni thei naupang ber a ni.

Billie Eilish chu Pioneers category-ah a lang a, Artist category-ah Scarlett Johansson langin, Dolly Parton pawh Icons category-ah a lang

Langsar zual dangte chu
Prince Harry leh a nupui Meghan chu Icons category-ah an lang. Titans category-ah American gymnast Simone Biles a lang bawk.

Innovators-ah Nvidia Corporation CEO Jensen Huang a lang a, World Trade Organization (WTO) Director-General Ngozi Okonjo-Iweala pawh Leaders category-ah hian a lang a ni.

Artists Category
He category hi ṭhalaite ngaihven tura ngaih a ni. Hming 16 a lang a, chung zingah chuan Titanic film aṭanga mite hriat lar Kate Winslet bakah Bad Bunny, Scarlett Johansson, Lil Nas X leh kumin Oscar-a che ṭha tak Nomadland director Chloe Zhao-te pawh an lang.