Gaming News ; Battlefield 2042 tlangzarh hun an sawn hla

Gamer tam takin an nghahhleh, Battlefield 2042 tlangzarh hun chu sawn hlat a ni a, ruahmanna hmasa aiin thla khatin an sawn hla a ni.

Electronic Arts chuan Ningani khan thuchhuah siamin October 22-a tlangzarh tura an ruahman chu November 19-ah an tlangzarh dawn zawk tih an puang a, Covid-19 hripui leng vanga harsatna an tawh avangin tlangzarh hun hi an sawn hla ta tih an tarlang bawk.

DICE studio general manager Oskar Gabrielson chuan,"Hripui leng kara Battlefield generation thar siam chuan hriat lawk loh harsatna min siam a ni," tiin thuchhuah an siamah a sawi a, tlangzarh hun an sawn hla tih a sawi a ni.

Battlefield 2042 hi Microsoft Windows, PlayStation 4, PlayStation 5, Xbox One, and Xbox Series X leh Series S-a khelh theih turin an tlangzarh dawn a, Battlefield series 17-na tur a ni tawh.