Germany Download Festival hmasa berah Metallica

England-a rimawi kût lar tak, France, Spain, Japan leh Australia-ah pawh an neih ṭhin Download Festival chuan nakkum lamah hian Germany a lut dawn a, chutah chuan heavy metal legend Metallica chu show headliner tur an ni.

Download Festival hi nakkum June 24-ah neih ṭan a ni dawn a, Hockenheimring racing track-ah Metallica hian mipui an buk tir suau suau dawn. He hunah hian Five Finger Death Punch leh Sabaton-te pawh inlan tur zingah an tel.

Castle Donington, England aṭanga bulṭan Download hi khawvela rimawi kût lar ber pawl niin kum 2003 aṭang khan an nei ṭan a, khawvela rock band lar ber ber an inlan ṭhin a, mi nuai chuangte'n he kût hi an chhim ṭhin a ni.