GMA Dove Awards 2021-a inlan tur zingah Lauren Daigle

Gospel Music Association (GMA)-in kumtina an sem ṭhin, GMA Dove Awards chu October 20 hian Allen Arena, Nashville, Tennessee-ah sem a ni dawn a, kar hmasa khan GMA lam chuan host tur leh inlan turte an puangzar a, Lauren Daigle chu inlan tur zingah a tel.

Christian music industry-a che ṭhate chawimawina inkhawm hi Natalie Grant leh Jonathan McReynolds-te chuan an kaihruai dawn.

Elevation Worship, KB, CeCe Winans leh Zach Williams-te chu kumin GMA-a inlan tur zingah hian an tel bawk. GMA Dove Awards 2021 nomination hi August 11 khan puanzar a lo ni tawh a, Steven Furtick chu nomination hmu tam ber niin 10 a hmu a, Elevation Worship leh Brandon Lake-te chuan dawtin anni hian pasarih ve ve an hmu thung.

Kumin GMA hi vawi 52-na a ni tawh dawn a, Trinity Broadcasting Network chuan a pe chhuak ang.