MDM-in General Assembly vawi li-na hmang ; President atan Tea Boihtlung thlang nawn

Music Domain Mizoram (MDM) chuan April 7, Inrinni khan Hotel Rits, Coference Hall-ah General Assembly vawi li-na an hmang a, hruaitu thar thlan­­na neih nghal a ni. MDM presi­dent ni lai B.Lalsawmzuala (Tea Boih­tlung) chu kum 2018-19 chhunga president atan thlan nawn a ni.

MDM Gereral Assembly hi session thumah ṭhen a ni a, chawhma lamah inthlanna buatsaih a ni. Tea Boihtlung chu president atan thlan a ni a, a ni hian kum 2019-a assembly an neih leh hma zawng a term hi a chelh dawn a ni. Gereral Secretary ṭanglai Lalnunkenga Chuaungo (Manuna) chu Vice President thar atan thlan niin, Assistant Secretary ni lai C.Vanlalmalsawma (Sawmtea) chu General Secreatry thar atan thlan tlin a ni bawk.

OB-ah hian mi thar pahnih an awm a, J.H Lallungmuana chu Assistant Secreatary thar atan thlan a ni a, treasurer atan Stacy V.L Muan­puii chu a tling bawk.

Session hnihnaah hian MDM Gereral Secreatry kalchhuak ta Manuna chuan report a pe a, Dr. Zothansanga hnena aṭangin MDM zinkawng ngaihnawm tak ngaihthlak a ni bawk. Session hnihna hi rorel inkhawmin a zui a, MDM hmalakna tur hrang hrangte rel a ni. Rorel inkhawm zawh hian Variety Programme a awm zui bawk.

MDM chuan Miss Mizoram 2018 T. Ramthanmawii (Than­thani) hnenah chawimawina thuziak an hlan a, a hnen aṭang hian thusawi ngaihthlak a ni bawk. Thanthani hian Miss Mizoram thlanna neih laia a project - luitui humhalh chungchang a sawi bakah, fuihna thu a sawi bawk a ni.

MDM Gereral Assembly vawi li-na hi Art & Culture Depart­ment-a Deputy Director Lalchuailova chuan khuallian niin a hmanpui a, Miss Mizoram 2018 T. Ramthanmawii (Thanthani) chu khual zahawm a ni.