MPSC Challenge Inter College Quiz Competition 2018 ; A zawna champion - HBC

MPSC Challenge Inter College Quiz Compe­tition 2018 chu April 6, Zirtawpni zan khan zawh­fel a ni ta a, Govt. Hrangbana College chuan Pachhunga University College hnehin a zawnin an champion.

HBC hi MPSC Chal­lenge Inter College Quiz Competition-ah a zawna champion thei hmasa ber an ni a, PUC lakah pawh hian phu takin hnenahna an chang a ni. Hetih rual hian Grand Finale bikah PUC chu round hmasa lama cheṭha zawk an ni a, mahse a tawp lamah HBC hian an lehthal leh a ni.

HBC hian lawmman Rs. 40,000 bakah, trophy leh certificate an dawng a, pahnihna PUC hnenah Rs. 20,000, trophy leh certificate hlan an ni. Semi-final-a tla Champhai leh City College ten Rs. 8,000 ve ve an dawng a, Aizawl pawn aṭanga lo telte hnenah T.A pek an ni bawk.

Grand Finale zan hian HBC aiawha ding Malsawmkimi chu 'Best Quizee' atan thlan a ni a, zawhna pariat a chhang dik. Malsawmkimi hi Grand Finale-a hmeichhe inlan awm chhun a ni bawk. Hetih lai hian MPSC Challenge Inter College Quiz Comeptition-a la tel kim vek, PUC zirlai Christopher Rodingpuia chu a pumpuia zawhna chhang dik hnem ber a ni a, zawhna 31 a chhang dik. Christopher-a hi 'Best Quizee of 2018' atan thlan a ni a, lawmman pawisafai leh trophy a dawng a ni.

Grand Finale hi Ignite Studio, Khatla-ah neih a ni a, a hmunah leh TV kaltanga lo entu an ṭha­hnem hle. HBC leh PUC zirlai leh zirtirtu eng emaw zat chuan an College-ah a huhoin an en bawk.

Mizo Students' Union (MSU) leh Mizo­ram Public Service Commission (MPSC) ṭangkawp chuan All India Civil Service-ah Mizo ṭhalai tam zawk an inziahtlin theih beiseiin, kum 2016 aṭang khan quiz competition hi an buatsaih ṭan a, kumtin neih chhoh zel a ni. Gov't Champhai College chu champion hmasa ber an ni a, HBC chu ṭum hnih an champion tawh. Heng college pahnih hi champion thei awm chhun an ni.

Kumin bikahah hian zirna-in 18 an tel a, Govt. Champhai College chuan semi-final lutin Aizawl pawn aṭanga thleng sang ber an ni.