Bail-in Salman Khan a chhuak

Bollywood actor Salman Khan chu sazuk kapah puh a nih avangin kum nga chhunga jail tang tura hrem a ni a, mahse Inrinni khan bail-a chhuah lailawk a ni.

Salman Khan hremna tur hi tun hnai khan Jodhpur court chuan a puang a, kum nga chhung jail bang zut tura tih a ni. Court thupek ang hian kar kalta Ningani khan Jodhpur Central Jail-ah dahluh a ni a, Inrinni khan bail-in a chhuak leh nghal. Salman Khan hi Rs 500,000-in bail chhuah a ni a, police escort-na hnuaiah Jodhpur airport panpui ngal a ni. Amah ngaisangtu mi tam takin airport-ah hian an hmuak a, a chenna Mumbai-ah pawh mi tam tak an pungkhawm a ni.

Salman Khan hian kum 1998 khan Rajasthan-ah ramsa humhalh bik, Indian antelope an tih Blackbuck pahnih a kap nia sawi a ni. Hemi chungchangah hian thubuai thehluh a niin, Jodhpur court chuan thiam loh a chantir ta a ni. Hetih lai hian a thurualpuite chu thiam chantir an ni thung.

Kum 52 mi Khan hian kum 1998 khan Jodhpur city-a film an channah Blackbuck hi a kap a, a chungthu hi court chuan vawi eng emaw zat a lo ngaihtuah tawh a ni.