Box Office-ah roreltu an inthlak ; A Quiet Place hun a thleng

Black Panther hun a liam hnuah Box Office-a roreltu an inthlak a, tunah chuan A Quiet Place hun a thleng ve leh ta. Thriller film hian tun weekend chhung khan $mtd 50 lalutin, Ready Player One a nek chhuak a ni.

A Quiet Place hi April 3 khan Indonesia-ah tlangzarh a ni a, US-ah pawh chhuah a ni tawh. US-ah hian sum lalut tam ber a ni nghal a, tlangzarh karah a che ṭha hle. Hetih rual hian kumina film chhuak zingah tlangzarh kara sum lakluh tam lamah pahnihna a hauh nghal bawk a, Black Panther chiah tluk loh a nei. Film chhuak thar eng emaw zatin beisei an phak loh laiin A Quiet Place erawh a che ṭha rih hle.

Beisei phak lo zingah hian Pacific Rim Uprising leh Swedish actress Alicia Vikan­der channa Tom Rider-te chu a langsar zingah an tel. March 23-a tihchhuah Pacific Rim Uprising hian sum lalut hnem ber nihna hauh hman mah se, a vul lai a rei lo. Kar liamta khan $mtd 4.9 chauh lalutin pakuana a hauh pha ṭawk a ni.

Kar hmasa lama sum lalut hnem ber Ready Player One chuan $mtd 25 lalutin, pahnihna a ni. Top 3-ah hian comedy film a lang a, chu chu April 6-a tlangzarh Blockers a ni. Blockers hian $mtd 21.4 zet a la lut a, Black Panther chuan a dawt. Black Panther hian $mtd 8.4 lalut lehin, a sum lakluh tawh zawng zawng chu $mtd 608 chuang a ni tawh. He fantasy film hi kumina film chhuak tawh tawh zingah chuan a la hit ber a, khawvel hmun hrang hrang aṭanga a sum lakluh tawh zat chu $tld1.3 chuang zet a ni.

North America Box Office bikah Titanic record a lo khum tawh bawk. I Can Only Ima­gine chu sum lalut tam panga-an a ni a, a hnuaiah hian Acrimony a awm. Thriller film Chappaquiddick bakah, Sherlock Gnomes chu sum hailut tam ziangah an tel bawk. Thla hmasa lawka tihchhuah Isle of Dogs chu top 10-ah a lang ve bawk a, $mtd 4.6 a lalut a ni.