Mystical Mizoram Ṭhazual Gospel-ah 'Pathian Hmangaihna' a ropui ber

Mystical Mizoram Ṭhazual Gospel-ah Maruati'n thiam taka a sak 'Pathian Hmangaihna' chu pakhatna a ni. Ṭhazual Gospel chart-ah hian 'Pathian Hmangaihna'-a hlate hi an che ṭha viau a, top 10-a hla paruk lai chu he album-a mi hi a ni.

Maruati 'Pathian Hmangaihna' a mawi
Fela Durtlang Leitan hla phuah ho dahkhawmna 'Pathian Hmangaihna' album title track 'Pathian Hmangaihna', Maruati'n thiam taka a sak hi Ṭhazual chart-a a lanna a rei tawh a, chart hmasaah khan pahnihna niin tunah chuan dinhmun ṭha berah a rawn ding ta a ni.

He hla hian thla hnih chhung vel lekin YouTube-ah thlirtu nuai thum dawn a nei tawh a, miin an ngaithla nasa hle tih a hriat.

Maruati hi tunhnai khan a YouTube channel khawih chingpensak a ni a, chumi a nih avang chuan YouTube lamah channel tharte a siam hial hman a, mahse tunah chuan a channel an khawih chingpen sak chu nei let leh tawhin a channel-a a hla hrang hrangte chu duh hun hunah a ngaihthlak leh theih tawh a ni.

Pahnihna Cindy, Fela hlate an mawi
Chart-a pahnihna chu Cindy Lalthanpuii'n thiam taka V Thangzama hla a sak 'Siamtu zai ngai' kha a ni a, chart hmasa lam aiin pen khatin hma a rawn sawn a, chart leh lamah pakhatna a ni thei dawn em tih chu hriat chakawm tawh tak a ni.

Pahnihna aṭanga pasarihna-a hlate chu Fela hlate vek an ni. Zorinsanga Sailo sak 'Ka thlang ber che' chu pathumna a ni thung a, Melody Lalzirliani 'Ka tan a tawk reng si' chu palina niin Arini chuan 'A nung ka hria' hmangin top 5 a khar.

Parukna leh pasarihna pawh 'Pathian Hmangaihna' album-a mi tho niin, Amtea leh Cindy-te chu parukna leh pasarihna an ni.

Top 10-a lang dangte
Angaihteii Hnialum hla thar 'Ka duh che' chu pariatna a ni a, Rla Colney 'A sawm reng che' chu pakuana niin One in Christ chuan 'Fak che ka nuam' hmangin top 10 an khar thung.