Emmy Awards 2021 ; The Crown lallukhum a chhah

Primetime Emmy Awards vawi 73-na chu Thawhṭanni zingah khan sem a ni leh ta a, The Crown chu che ṭha ber niin, award pasarih a dawng. Apple TV comedy Ted Lasso chu che ṭha ber dawttu niin award pali a dawng ve bawk a ni.

Event Deck, L.A. Live, Downtown Los Angeles, California-ah award semna ceremony hi buatsaih a ni a, CBS leh Paramount chuan pe chhuakin Cedric the Entertainer chuan award sem inkhawm hi hneh takin a kaihruai.

Outstanding Drama Series -The Crown
Emmy Awards-a award ngaihhlut Outstanding Drama Series chu The Crown-in a dawng. The Crown hian award ngaihhlutawm tak tak a hui deuh vek a, Outstanding Drama Series bakah hian Outstanding Writing for a Drama Series a dawn bakah director Jessica Hobbs chuan Outstanding Director - Drama award a hum haw a ni.

Gillian Anderson chuan Outstanding Supporting Actress - Drama award a dawng a, Tobias Menzies chuan Outstanding Supporting Actor - Drama dawng bawkin, Olivia Colman kutah Outstanding Actress - Drama award hlan a ni. Prince Charles lema chang Josh O'Connor chu Outstanding Lead Actor in a Drama Series award dawngtu a ni bawk.

Ted Lasso ve thung
Apple TV comedy Ted Lasso chuan Outstanding Comedy Series award a dawng a, Jason Sudeikis chu Outstanding Actor - Comedy award dawngtu niin Outstanding Supporting Actor - Comedy chu Brett Goldstein chuan a dawng bawk. Hannah Waddingham chuan Outstanding Supporting Actress - Comedy award a dawng thung a ni.

Award dawngtu langsar zual ṭhenkhat
HBO Max series Hacks leh HBO series Mare of Easttown-te chuan award pathum ve ve an dawng a, HBO series tho Last Week Tonight with John Oliver leh Netflix hit The Queen's Gambit-te chuan award pahnih an dawng ve ve bawk.

Kuminah hian nikum June 1 aṭanga kumin May 31 thlenga U.S. prime time programme ṭha zual thlan chhuah zinga nomination hi siam a ni a, July 13 khan nomination puan a ni.

Apple TV+ sports comedy Ted Lasso chu nomination hmu tam ber niin 13 lai a hmu a, Primetime Emmy Awards-a a nomination hmuh tawh zawng zawng chu 20 lai niin Primetime Emmy Awards history-a nomination hmu tam ber a ni. Fox musical comedy-drama Glee record lo siam tawh chu a khum.

Network ang zawngin
Kumin Primetime Emmy Awards-ah hian Netflix chu an che ṭha leh ber a, Netflix series pakua laiin award an dawng. HBO series pangain dawng bawkin Apple TV+ series paliin an dawng bawk a, streaming service la tharlam tak HBO Max-a pek chhuah series pathumin award an dawng bawk.