Virthli Festival ; Varsity Miss & Mister thlang dawn, zan lamah festival kharna Inferno

Ninga awh Mizoram Uni­versity kutpui Virthli chu vawiin hian a ṭiak tawh dawn a, chhun lamah Varsity Miss leh Mister thlanna neih a ni ang. Zan lamah festival khar nan Inferno hman a ni dawn a, DJ leh band te an che dawn.

Varsity Miss & Mister
Festival main event zinga mi Varsity Miss leh Mister thlanna chu vawiin hian neih a ni dawn. Varsity Miss thlanna hi festival neih a pianga ngaihven hlawh ber pawl a ni ṭhin a, kuminah pawh ngaihven a hlawh leh hle. Department hrang hrang ten an nula chhuanvawr an thehchhuak dawn a, hmuh chakawm tawh tak a ni. Hetih rual hian kum danga la awm ngai lo Mister thlanna a awm tel dawn bawk.

Endik hna thawk tura sawm­te pawh an hrawl hle a, Henry Varte, Goosh Vangchhia, Dr Cherrie L Chhangte bakah, Miss Mizoram 2017 Rody H. Vanlalhriatpuii te an ni. He hun hi Miss Mizoram nihna chelh mektu T. Ramthanmawii (Thanthan-i) chuan a hmanpui dawn bawk.

Intihsiakna hi round thumah ṭhen a ni dawn a, Cul­tural Round, As you Like It leh Eve­ning Gown tih theme hmangin an inel ang.

Inferno chu
Zirlaite leh MZU aṭanga zirchhuak tawh mi tam takin an nghahhlelh chu Inferno a ni. Zanin tlaiah Virthli ruaipui ṭheh a ni ang a, Inferno-in a zui ang. A boruak chhim tawh ten an zawngchhang a, la chhim ve lo ten tel an chakna a nih miau avangin, festival khar nan chuan duhthusam a tih theih ang.

He hunah hian DJ Bill LMS leh RSA-te an che dawn a, tunlai Mizo rock band ṭha ber pawl Avora records an perform dawn bawk.

Nimin lamah Got To Dance leh Runway showdown neih a ni. Lamthiam te inelna Got To Dance-ah hian Frozen Crew-te chu pakhatna an ni. Beauty and the Beast-te chu pahnihna niin, Nintendo-te chu pathumna an ni. Entu mipui chawkhlim ber, Best Entertainer-ah Dem Boys crew thlan an ni bawk.

Runway showdown bik hi he chanchin buatsaih lai hian result kan hre hman lo thung.