Avengers-in Black Panther khum nghal der
Marvel superhero movie 'Avengers: Infinity War' chu April 25 khian tlangzarh a ni dawn a, pre-booking-ah tun lai film lar 'Black Panther' chu a khum nghal der.
American actor Robert Downey Jr. channa hian tlangzarh a nih hma hauh aṭangin boruak a nei lian hle a, kumina film chhuak thar tur zingah chuan ngaihven hlawh ber tih ngam a ni. Tlangzarh a nih hmaa Black Panther pre-booking ticket hralh zat chu a khum nghal a, a letin a khum! A lan dan chuan Avengers film pathumna tur hian record a siam ngeiin a rinawm.
Kum 2015-a tihchhuah 'Avengers: Age of Ultron' pawh kha a khum thei dawn nia tarlan a ni a, Furious 7 pawh a khum theih beiseina a sang hle. Film expert-te chuan tlangzarh aṭanga ni thum chhungin US-ah ringawt $mtd 200 chuang a lalkluh an ring cheu bawk. Pre-booking-a a khum Black Panther hian hetiang hunah hian $mtd 202 a lalut a, hei hi a khum theih an ring a ni.
The Avengers ($mtd 207.4), Jurassic World ($mtd 208.8), Star Wars: The Last Jedi ($mtd 220) leh Star Wars: The Force Awakens ($mtd 248)-te chu tlangzarh aṭanga ni thum chhunga sum lalut tam zual an ni a, hei hi a khum thei dawn em tih chu hunin a hril dawn a ni.
Avengers: Infinity War hi Anthony leh Joe Russo ten an direct a, Robert Downey Jr bakah Holloywood star rual Chris Evans, Chris Hemsworth, Mark Ruffalo leh American actress Scarlett Johansson te pawh an chang a ni.