Shang-Chi and the Legend of the Ten Rings bawkin ro a rel
Box Office-ah 'Shang-Chi and the Legend of the Ten Rings' bawkin ro a la rel chhunzawm a, kar thum chhung a zawnin sum lalut tam ber a ni tawh.
Shang-Chi bawk
An tlangzarh aṭangin kar thum lai liam tawh mah se 'Shang-Chi and the Legend of the Ten Rings' chu North America lama chengte chuan an la hlut vet vet hle a, tun kar tawp liam taah pawh khan sum lalut tam ber a ni leh.
Kar tawp liam ta chhung khan theatre 4,070-ah pe chhuakin $21,670,751 lai a lalut leh a ni.
'Shang-Chi' hian North America Box Office aṭang ringawtin $176,864,306 a lalut tawh a, ram dang aṭangin $111,944,476 lalut tawh bawkin Box Office aṭanga a sum lakluh zawng zawng chu $288,808,782 a ni tawh a, hripui len hnua film tlangzarh zingah chuan hlawhtling ber pawl a ni der tawh.
Kar hmasa lama pahnihna 'Free Guy' bawk pahnihna ni lehin $5,086,435 a lalut a ni.
Top 10-a film thar pathumte chu
Clint Eastwood-a direct, neo-Western drama film 'Cry Macho' chu pathumna a ni. He film hi kum 1975-a tlangzarh 'Cry Macho' lehkhabu behchhana siam niin amah Eastwood hi achangtupa ber a ni nghe nghe. Dwight Yoakam nen chang dunin kar tawp liam taah khan theatre 3,967-ah tihchhuah a ni a, $4,426,161 a lalut a, pathumna a ni.
Box Office-a parukna 'Copshop' pawh film thar a ni a, $2,315,638 a lalut. Copshop hi chu 'thriller' film ni thungin Gerard Butler, Frank Grillo, leh Alexis Louder-te an chang a, critics lam chuan he film hi an fak angreng hle.
Top 10 khartu 'The Eyes of Tammy Faye' pawh film thar a ni a, Jessica Chastain leh Andrew Garfield-te film niin biographical drama a ni thung.
Film thar dang
Box Office Mojo chart-ah film 48 tarlan a ni a, chung zingah chuan Blue Bayou (13), The Nowhere Inn (28), Wife of a Spy (34) leh Little Girl (42)-nate chu film thar an ni bawk.
US-a la tlangzarh loh 'Dune'
Warner Bros/Legendary film, thawm nei ring tak science fiction film 'Dune' chu ram hrang hrangah tlangzarh ni tawh mah se US-ah erawh tlangzarh a la ni ve lo. Film Industry inpui North America lamah la chhuah a la ni lo nachungin $mtd 37 chuang a lalut der tawh.
'Dune' hi movie tuipuitu, a bik takin science fiction lam hmuhnawm ti tan chuan film nghahhlelhawm tak tur a ni. September 3 khan Venice International Film Festival-ah khan premiere a ni a, chuta ente chuan an fak viau.
He film-ah hian film star lar tak tak an inlan tam hle. Chung zingah chuan kumin Met Gala co-chair Timothée Chalamet pawh kha telin ani hi a changtu deuh ber a ni. Rebecca Ferguson, Oscar Isaac, Josh Brolin, Dave Bautista, Stephen McKinley Henderson, Zendaya, David Dastmalchian, Chang Chen, Sharon Duncan-Brewster, Charlotte Rampling, Jason Momoa, leh Javier Bardem-te pawh he filmah hian an chang.
October 22 hian US-ah chuan an tlangzarh dawn chauh thung a ni.
