Virthli Festival a ṭiak ta Varsity Miss - Zomuansangi

Mizoram University festival Virthli chu a ṭiak ta a, Varsity Miss leh Mister thlannaah English Department an che ṭha hle. Varsity Miss atan Zomuansangi chu thlan a ni a, Lallawmkima chu Mister atan thlan a ni bawk.

Miss leh Mister atana thlan te hi English Department ve ve an ni a, roreltu an ni. Varsity Miss contes­tant zingah Zomuansangi chhing zo an awm lo a, endiktute mit a tlung ber. Betty Lalmuanpuii chu first runner up niin, a ni hi History and Ethnography Department a ni thung. Journalism And Mass Communication Department aiawhtu Amy Felicia Danielle chu second runner up a ni bawk.

Mister atana thlan Lallawm­kima chu English Department mawina belhchhahtu a ni a, Commerce Deparment aiawha tel Dominic Vanlalruata chu first runner up a ni a, second runnner up chu Rudraksh Dev niin, Planning and Architecture Department a ni thung.

Mimal lawmman sem a ni a, Miss Catwalk-ah Jugami Boro thlan niin, Miss Personalityatan Lalrinnungi thlan a ni. Mipa lamah K. Malsawmzuala chu Mister Physique-ah thlan niin, Mister Personality-ah Ricky Lalnunsiama Chawngthu thlan a ni thung.

Runway Showdown
Ningani khan main event zinga mi Runway Showdown chu neih a ni a, Commerce Department chu pakhatna an ni. Mizo Department chu pahnihna niin, English Department ten pathumna an hauh ve bawk. Lawmman sum fai tamna ber intihsiakna hian ngaihlut a hlawh a, tel pawh an ṭhahnem hle.

Festival khar ni hian futsal final khelh a ni bawk a, Is Following (B.Ed) te chu champion an ni. Final-ah hian Is Following (B.Ed) hian Engineering Cell te an sawp a, trophy leh pawisa fai Rs. 8,000 an dawng a ni.