Billboard chart-ah Drake bawk a la langsar

Billboard chart hrang hrangah Canadian artist Drake bawk a la langsar zel a, Billboard 200 chart-ah leh Artist 100 chart-ah topper a ni leh a, Hot 100 lamah erawh The Kid LAROI & Justin Bieber 'Stay' bawk pakhatnaah a rawn invawrh leh thung.

Billboard 200 chart-ah 'Certified Lover Boy' bawk
Billboard 200 chart-ah chuan kar hmasa lama record hrang hrang siamtu Drake-a studio album parukna 'Certified Lover Boy' bawk pakhatna a ni leh.

'Certified Lover Boy' hi a zawnin kar hnih chhung chu US mipuite'n an album ngaihthlak nasat ber a ni ta a, kar hmasa chhung khan equivalent album unit 236,000 lai a la hmu chhuak leh a, heta ṭanga 6,500 chu album sales a nih laiin a hlate chu vawi maktaduai 305.43 vel zet an stream thung.

Pahnihna chu Kanye West studio album 10-na Donda bawk kha ni lehin kar liam ta chhung khan EAU 79,000 a hmu chhuak a, pakhatna nen hian an inthlau rem rem hle.

Pathumna chu Kacey Musgraves album thar 'Star-Crossed' ni thungin EAU 77,000 a hmu chhuak a ni. 'Star-Crossed' hi Billboard 200 chart-ah hian pathumna ni mah se album copy erawh a hralh tam ber thung a, kar hmasa chhung khan copy 47,000 lai a hralh a, album sales chart lam erawh a thunun thung.

Lisa 'Lalisa' chu Global 200 chart-ah leh Global 200 Excl. US chart-ah pahnihna a ni ve ve ■

Artist 100-ah pawh Drake tho
Drake hi Artist 100 chart lamah pawh pakhatna a ni leh a, Kacey Musgraves chuan dawtin Olivia Rodrigo chu pathumna a ni thung.

The Hot 100-ah 'Stay' a cham rei
Kar hmasa lamah Billboard Hot 100 chart Drake-a'n a luah hneh a, tunah erawh kar hmasa lama parukna The Kid LAROI & Justin Bieber 'Stay' chu pakhatna a rawn ni leh ta.

Drake-a hla pathum lai Hot 100 chart-ah hian a la lang tho a, Future & Young Thug a thawhpuina 'Way 2 Sexy' chu pahnihna niin, Knife Talk chu palina a ni thung a, Girls Want Girls hmangin top 10 a khar bawk a ni.

Ed Sheeran 'Bad Habits' chu pathumna a ni thung a, Walker Hayes 'Fancy Like' chu pangana a ni bawk.

Chart dang, Lisa a rawn lang e
Songs of the Summer chart lamah chuan BTS 'Butter' bawk pakhatna a la ni a, Global 200 chart-ah leh Global 200 chart Excl. US chart-ahte chuan The Kid LAROI & Justin Bieber 'Stay' chu pakhatna a ni ve ve bawk.

Global 200 chart-ah leh Global 200 chart Excl. US chart-ah hian Lisa 'Lalisa' chu pahnihna a ni ve ve a, Lisa hi a vawi khatna atan Billboard chart-ah solo artist angin a hming a lang ve ta a ni.