2022 Grammy Nominee Nov 23-ah

2022 Grammy nomination chu November 23, Thawhlehni hian puan a ni dawn tih Recording Academy chuan an puang.

Kumin Grammy award dawngtur thlannaah khan buaina leh sawiselna neuh neuh a tam avangin nakkum hi chuan nominee puan dan phung pawh a danglam tawh rin a ni a, Recording Academy chuan nomination committee a ruka an din ṭhin chu an titawp tawh dawn a, Grammy voting body chuan langsar takin nominee an siam tawh dawn.

Nikum lama artist tla na ber pawl, The Weeknd hming nomination list-ah a lan loh avanga demna nasa tak an tawh avangin Recording Academy lam chu an fimkhur tawh hle a ni.

Nikum September aṭanga kumin September thla chhunga hla leh album chhuakte aṭangin nomination an siam dawn a, Oct. 22-Nov. 5 chhungin voting round hmasa ber an nei ang. November 23-ah 64th Annual Grammy Awards nominee puanna an nei ang a, Dec. 6, 2021-Jan. 5, 2022 inkarah final voting round an nei leh ang.

64th Annual Grammy Awards hi nakkum January 21-ah Los Angeles’ Staples Center-ah ropui taka sem an tum a ni.