Fantastic Beasts 3 title leh tlangzarh hun tur chu

Fantastic Beasts 3 chu a title leh tlangzarh a nih hun tur puan a ni ta.

'Fantastic Beasts: The Secrets of Dumbledore' tih a ni dawn a, April 15, 2022-ah cinema hall hrang hrangah chhuah a ni dawn.

'Fantastic Beasts: The Secrets of Dumbledore' -ah hian Magizoologist Newt Scamander lemah Eddie Redmayne chu a chang leh dawn a, Jude Law pawh Professor Albus Dumbledore lemah a chang leh dawn bawk a, Johnny Depp erawh Amber Heard nena an thubuai avanga a chan chhunzawm theih dawn tak loh avangin Mads Mikkelsen-in a thlak dawn a, Mads Mikkelsen hi Gellert Grindelwald a ni dawn thung.

Kum 2016 khan Harry Potter film series prequel 'Fantastic Beasts and Where to Find Them' tihchhuah a ni a, a hlawhtlingin $mtd 814 lai a lalut. A chhunzawmna 'Fantastic Beasts: The Crimes of Grindelwald' chu kum 2018 khan tlangzarh leh niin hei pawh hi a hlawhtling leh viau a, $mtd 654.9 lai a lalut leh a ni.

Tuna a title tur an puanzar, 'Fantastic Beasts: The Secrets of Dumbledore' hi November 12, 2021-a tlangzarh tura ruahman a ni a, mahse hrileng vangin sawn hlat a ni. A tirah tak chuan nakkum July thla laihawla tlangzarh an tum a, mahse thla thum laia sawn hma lehin April 15, 2022-ah tlangzarh an tum ta zawk a ni .

'Fantastic Beasts: The Secrets of Dumbledore'-ah hian Katherine Waterston, Dan Fogler, Alison Sudol leh Ezra Miller-te pawh an inlan leh dawn a, The Crimes of Grindelwald hnu kum eng emaw zata thil thleng anga chan niin, Rio de Janeiro, Brazil, leh Berlin, Germany vela thil thleng anga chan a ni dawn a, Indopui II-na hunlaia dawithiamte inrawlh dan vel pawh kan hmu dawn a nih hmel.