Khawvel fang chhuak thei naupang ber Lexie Alford

American mi Alexis Rose Alford (Lexie Alford) chuan kum 21 lek a nihin amahin khawvela mahnia ro inrel ram 196-te chu a tlawh chhuak vek a, Guiness World Record chuan khawvel fang chhuak zinga naupang berah a puang tawh nghe nghe.

Lexie Alford hi tunah chuan kum 23 ani ve tawh a, travel agency neitu fanu a ni bawk nen, khawvel ram hrang hrang tlawh chhuak zingah ani aia upa an awm ta lo.

eoronews.travel-in an kawmnaa a thukhawchang
Lexie nu hian kum 19 mi lek a nihlai aṭangin travel agency a nei tawh a, chumi a nih avang chuan a tetlai aṭangin ram hrang hrangah a nuin a hruai nasa a, amah pawhin nuam a ti hle tih 'eoronews.travel'-in an kawmnaah a sawi.

"Kum 18 mi ka nih chuan ram 70 ka tlawh der tawh a ni. Kum 18 ka nihin associate degree ka nei tawh a, mahse kum 12 mi lek kan nih lai aṭanga ka chak ber ṭhin chu, kum khat tawp sikul kai lo leh hnathawk loa awm a ni. Chumi a nih avang chuan, pawisa ka khawl a, eng emaw zat ka khawl hman a, khawvel ram hrang hrang ka tlawh thei ta a ni.

"Kum 18 mi lek ka la ni bawk a, hun ka nei a ni tih ka inhria. Chumi avang chuan ram hrang hrang tlawh chhuak zinga naupang ber chu Google kaltlangin ka zawng ta a, James Asquith Guinness World Record chu ka hmu ta a.

'Chumi ka hmuh chuan, chu record chu khûm ka tum lo a nih chuan ka damchhung zawngin ka inchhir tawh dawn tih ka hre ta a ni," tiin a sawi.

■ Lexie Alford hian kum 2013-a James Asquith record lo siam tawh chu a khûm. James Asquith hian kum 24 mi a nihin khawvel a fang chhuak ■

Ram nuam a tih zualte
Lexie Alford chuan ram nuam a tihzual panga a sawi. Venezuala chu a mawi avanga nuam a tih thu a sawi a, Pakistan chu khual chhawn thiam ber an ni, a ti thung.

Egypt pawh sawi telin, a history avanga ropui a tih thu a sawi a, Iceland pawh a nuam tih zingah telin khawvela hmun danglam ber niin a sawi hial.

Indonesia pawh nuam a ti hle a, 'diver' a nih angin 'diving' tih theihna hmun chu nuam a ti viau niin a sawi.

Mahniin ram a tlawh hnem
A naupan lai aṭangin a nu leh pate nen ram hrang hrang tlawh tawh mah se, ram 50 vel zet chu amahin a tlawh. Thla sarih thla riat vel chu amahin hun a hmang.

May 31, 2019 khan kum 21 leka upa Lexie Alford chuan North Korea-ah a ke a nghat ta a, chumi ni chuan khawvel fang chhuak thei naupang ber a ni ta a ni.

Alford hian Guiness-a chhinchhiah a nih theihna atan hian finfiahna 10,000 chuang a nei a, ram, mahnia ro inrel thei 196 zet a tlawh.