Gaming News ; Pokémon MOBA game hmasa ber a chhuak ta

Pokémon multiplayer online battle arena (MOBA) game hmasa ber Pokémon UNITE chu Nilaini khan Android leh iOS platform-a khelh theih turin chhawp chhuah a ni ta.

The Pokémon Company leh TiMi Studios ṭangkawpina an chhawp chhuah MOBA game hi a thlawnin a download theih a, tunah chuan Nintendo Switch chauh ni lo, mobile phone leh tablet velah awlsam takin a khelh theih tawh a ni.

MOBA game dang ang bawkin team pahnih, player panga ve vea intum tur a ni a, Pokémon hrang hrang thlan tur a awm a, game chhungah an 'evolve' thei bawk. Charizard i hmang duh a nih chuan Charmander hmanga bul ṭan a ngai a, game pakhat chhungah evolution form nei ho chu an 'evolve' mai tihna a ni.

He game hi Nintendo Switch hmangtute chuan July 21 aṭang khan an khel thei daih tawh a, Android leh iOS-a tlangzarh a nih hma pawhin gaming website hrang hrangah a lar hman hle.

Pokémon UNITE hi IGN chuan 6/10 rating a pe a, Nintendo Switch lamah chuan kar hmasa Ningani thleng khan download maktaduai 9 chuang a awm tawh. Mobile a khelh theih tura tlangzarh a nih hma khan pre-registration mtd 7.5 a awm hman.