Bollywood lamah Aizawl FC film ; Mizo ṭhalai a tam thei ang ber an tel ang - Tarun Rathi

Khelmual chhunga Aizawl FC chet ṭhat chuan khelmual pawn a thleng dawn ta - India ram barakhaiha season liam taa I-League Champion chungchanga Bollywood Film siam tura hmalakna chu tluang takin a kal zel a, producer Tarun Rathi chuan Aizawl rawn tlawhin a hmalak dante a sawi a, Mizo ṭhalaite an tel ve tur thu a sawi.

Kan la hre ṭheuh ang - India rama football inelna sang berah Aizawl FC chu 2016-2017 season-ah an champion a, hei hi football khawvelin mak a ti.

Sum tam tak seng club-te hneh a, player hlawh sang tak takte aia sanga invawrh chho Aizawl FC chanchinin ngaihven a hlawh a, hei hi Bollywood lamin an lo hria a, film-a chantir an tum ta a ni.

Director Neeraj Pathaka hi a scrip writer a ni nghal a, tunah hian Aizawl FC chanchin hrang hrangte la khawmin an zir chiang tawh a, flim-a chan chhuah theih turin an ziak chho mek a, script writing lam hi chu an peih fel ṭep tawh a ni.

A film producer Tarun Rathi hi tun hnai khan Aizawlah a lo zin a, Aizawl FC hotute nen an inkawm bakah Mizoram Governor-te a kawm. Producer hian Larsap hi a film kalphung turte hrilhfiah a, Mizo ṭhalai a tam thei ang ber teltir an tum a, a tam thei ang ber chu Mizoramah ngei shooting neih an tum thu a sawi.

He film siam turah hian Aizawl FC academy lama awm­te leh Aizawl FC senior player-te pawh an lang dawn a ni.

Aizawl FC hi India hmar chhak state aṭanga I League-a champion hmasa ber leh a awm chhun an ni.