Super Mario Bros film-ah Anya Taylor-Joy leh Chris Pratt

Nintendo chuan Super Mario Bros film an siam tur voice cast turte hming an puangzar ta a, film tlangzarh an tum hun pawh an tarlang nghal bawk.

Khawvela video game lar ber pawl, Super Mario Bros film-a siam turah hian tunlai film star lar ber pawl, The Queen's Gambit star Anya Taylor-Joy aw chu Princess Peach aw-ah hman a ni dawn a, Avengers star Chris Pratt leh Pacific Rim star Charlie Day-te chu Mario leh Luigia an ni dawn thung. Chumai a la ni lo Jack Black pawhin a awm a thawh dawn a, Bowser aw atan a aw an hmang dawn.

Seth Rogen chu Donkey Kong a ni dawn a, Keegan-Michael Key chu Toad ni dawn thungin Cranky Kong aw atan Fred Armisen aw an hmang dawn bawk. Kevin Michael Richardson leh Sebastian Maniscalco-te pawhin an aw an thawh dawn a ni.

Nakkum December 21-ah hian Universal Pictures kaltlangin Super Mario Bros film hi tlangzarh an tum a, Aaron Horvath leh Michael Jelenic-te chu director tur niin Matthew Fogel chuan script a ziak thung ang.

Nintendo game Super Mario hmasa ber chu kum 1985-a tihchhuah daih tawh kha a ni. Super Mario hi Khawvela video game series hralh kal palina a ni phak a, copy maktaduai 380 chuang an hralh tawh!

Kum 2018 kum tir lamah khan Nintendo chuan Despicable Me, Minions leh Sing vel tichhuaktu Universal Studios thawhpuiin Super Mario film siam tura ruahmanna a awm chungchang hi an lo sawilang tawh a, Nintendo leh Universal Pictures hi film siamna man tumtu tur niin Universal Pictures chu khawvel ram hrang hranga film pekual tur an ni thung.

Kum 1993-ah khan Super Mario Bros live-action film hi tihchhuah a lo ni tawh a, chu film-ah chuan Bob Hoskins, John Leguizamo, leh Dennis Hopper-te an chang a ni.

Director tur pahnih Aaron Horvath leh Michael Jelenic-te hi animated series 'Teen Titans Go!' leh a film 'Teen Titans Go! To the Movies'-ahte khan an lo thawkdun tawh a, tunah hian an thawhdunna film kan hmu leh dawn ta a ni. Script ziaktu tur Matthew Fogel pawh hian 'The Lego Movie 2: The Second Part'-ah khan sulhnu a lo hnutchhiah ve tawh bawk.

Nintendo hian Ningani khan Nintendo Direct event-ah Super Mario Bros film chungchang hi an puangzar a ni.