Nirvana ‘Nevermind’ 30th Anniversary Edition-ah hla la tihchhuah loh 70

Nimin, Zirtawpni kha khawvela band ropui ber pawl, Nirvana-in an studio album pahnihna 'Nevermind' an tihchhuah aṭanga kum 30-na a ni. Hemi pual hian Nirvana chuan November thlaah hian 'Nevermind' 30th Anniversary edition an tichhuak dawn a, chutah chuan an hla la tlangzarh ngai loh 70 zet an dah tel dawn!

An hla hit ber ber awmna ‘Nevermind’ kum 30 tlin lawmna puala an album tihchhuah turah hian audio leh video track la tihchhuah loh 70 dahtel a ni dawn a, Nirvana fan-te tan chuan thu hriat nuam tak a ni ngei ang. Heng hlate hi November 12 aṭang hian an tichhuak ṭan dawn a, an hla tlangzarh tawh sate nena belhkhawm phei chuan track 90 lai a awm dawn a ni.

‘Nevermind’ hi Seattle rock trio Nirvana khawvelin a hriat ṭan tak takna album a ni a, vawiin thleng hian ram hrang hrangah copy mtd. 30 chuang hralh a ni tawh'

Super Deluxe Edition pawhin an tichhuak tel dawn a, CD/Blu-ray version pawh a awm dawn bawk a, November 25, 1991-a club Paradiso-a an concert-na, Live in Amsterdam, Netherlands, Blu-ray an remaster pawh an tichhuak tel dawn.

‘Nevermind’hi Foo Fighters frontman Dave Grohl, Nirvana drummer a nih hnua an album tihchhuah hmasak ber niin vawiin thlenga khawvelin Nirvana a hmelhriatna hla lar ber ber- 'Smells Like Teen Spirit', 'Come as You Are', 'Lithium' leh 'In Bloom' tih vel awmna album kha a ni.

He album hi a hunlai khan a lar rem rem hle a, US Billboard 200 chart-ah No.1 hial niin, kar khat chhungin album copy nuai thum zet an hralh hman bawk. Tun thleng hian ram hrang hrangah copy maktaduai 30 chuang an hralh tawh a, khawvela album hralh tam ber zinga mi a ni hial!