Cardi B-i'n record siam

Cardi B chuan kum bul a ṭan ṭhat chu chhunzawm zelin, a album thar 'Invasion of Privacy' chu Billboard 200 album chart-ah pakhatna a ni. American rapper hi hmeichhe rapper zinga hetiang thleng thei pangana chiah a ni a, kum 2012 hnulama chart-a No.1 hauh leh thei awm chhun a ni bawk.

New York nula hi tunlai rapper zingah chuan thawm nei lian ber pawl a ni a, hmeichhia bikah phei chuan tuma tluk rual lohin a invawrh chho mek. Tun thla tir khan a studio album hmasa ber 'Invasion of Privacy' hi a tlangzarh a, US-ah chuan album hralh kal ber a ni mek.

Cardi B hian Billboard 200 Album chart-ah No. 1 a hauh rual hian Nicki Minaj, Eve, Foxy Brown leh Lauryn Hill te hnung a zui a ni.

Nicki Minaj chu No.1 hauh thei hnuhnung ber niin, kum 2012 khan 'Pink Friday: Roman Reloaded' album hmangin hmeichhe rapper zinga pakhatna hauh thei dinhmunah a lo inhlangkai tawh. Kum eng emaw zat a liam hnuah Cardi B a lo lang a, a ni hian a vang lai a hmang chho mek.

'Bodak Yellow' singer hi album vawi khat tihchhuahna-a Billboard 200 Album chart-a pakhatna hauh thei pahnihna a ni nghal bawk a, kum 1999 daih tawha Eve record lo siam tawh chu a nih rual ve ta a ni. Anni pahnih chiah hi hmeichhe rapper zingah he tiang thleng thei hi an la awm bawk.