Country Music Award sem a ni ta

Kum tina sem ṭhin Academy of Country Music Award (ACM) chu Pathianni zan khan MGM Grand Garden Arena, Las Vegas Las Vegas-ah a ṭum 53 nan sem a ni leh ta.

ACM Award-ah hian Miranda Lambert leh Chris Stapleton te chu mimala langsar an ni a, award ngaihlut pahnih ve ve an hum haw. Lambert hian Female Vocalist of the Year award a dawng a, a hla hit 'Tin Man' chu Song of the Year atan thlan a ni bawk.

Lambert hian ACM Award a dawn ṭum khatna a ni a, a dawn chhunah erawh a langsar hle thung. Chris Stapleton hian Male Vocalist of the Year award a dawng a, award ngaihlut hlawh dang Album of the Year chu a dawng bawk. Chris Stapleton hian a album 'From a Room: Vol. 1' chu a hlawhtlinpui zui zel a ni.

American singer Jason Aldean kutah Entertainer of the Year award hlan a ni a, Vocal Group of the Year atan Old Dominion thlan an ni bawk. Keith Urban chuan award a humhaw ve bawk.

ACM Award hi country music-a chawimawina sem chhuah ṭhin zingah chuan ngaihhlut ber pawl a ni a, tun ṭumah pawh hian country singer an fuankhawm ṭha hle. Award ceremony-ah hian Carrie Underwood a perform a, Blake Shelton, Kelly Clarkson, Kelsea Ballerini, Dierks Bentley, Luke Bryan, Florida Georgia Line, Miranda Lambert leh ziathiam dang eng emaw zat an inlan bawk.