Kendrick Lamar kutah Pulitzer Prize

United States khua leh tuite hnena newspaper, magazine, online journalism, literature leh musical huanga chawimawinsa sem ṭhin Pulitzer Prize chu Thawhṭanni khan sem a ni a, music huangah Kendrick Lamar chuan chawimawina dawngtu a ni.

Compton-born rapper Kendrick Lamar hian nikum khan album 'Damn' a tichhuak a, hemi hmang hian Pulitzer Prize hi a dawng a ni.

Lamar chuan chawimawina a dawng thei chu lawmawm a tih thu sawiin, sawi fiah thiam harsa tak a ni, a ti. Pulitzer committee chuan Lamar hian music lamah a thawhhlawk em avangin award pek hi a phu hle tih an sawi ve bawk.

Award hi category hrang hrangah ṭhen niin, journalism, letter, drama leh music-ahte ṭhen a ni. Journalism huangah hian New York Times leh The New Yorker te chu award dawng langsar an ni a, public service lama an hnathawh ṭhat avangin chawimawina hi pek an ni. The New York Times hian National Reporting award pawh an dawng bawk a ni.

Breaking News Reporting award chu The Press Democrat, Santa Rosa kutah hlan niin, Investigative Reporting chu The Washington Post lamin an la ve thung a, award pahnih an dawng a ni. Breaking News Photography award chu The Daily Progress ami Ryan Kelly hnenah hlan niin, Feature Photography chu Reuters hnenah hlan a ni bawk. Award hi 24 zet semchhuah a ni.