Bharat film-ah Salman Khan leh Priyanka Chopra

Bollywood super star Salman Khan leh Priyanka Chopra te chu Bharat film-ah an chang dun dawn a, ngaihven a hlawh nghal hle.

Bharat hi kum 2019-a tichhuah tur a ni a, a changtu tur an hrawl avangin boruak nei nghal hat. A changtupa tur ber Salman Khan hi kum 20 vel kaltaa sa a pelh avangin tun hnai khan thiam loh chan tir a ni, Mahse bail-in a chhuak leh tawh a, film chang turin a inpeih leh der tawh!

A chanpui tur Priyanka Chopra hi Hollywood thlenga hnuhma nei ṭha a nih avangin an film chan tur hi a hit hle dawn niin a lang. Salman Khan chuan twitter kaltlangin Priyanka a lawmna thu hi Nilaini khan a tarlang a, "Bollywood-ah i lo kir leh ta, kan lo lawm a che" tiin a tarlang.

Baywatch star Priyan­ka hi 'Quantico' atan shoo­ting neiin a buai hle a, Hollywood film pahnih - A Kid Like Jake leh Isn't It Romantic?-ahte a chang leh dawn bawk. Hetih karah hian Bollywood lam a hawi a, a channa lo en tawh ṭhin tan chuan thu lawmawm tak a tling. Bharat hi shooting neih ṭan a ni tawh a, Priyanka pawh hian a zawm thuai rin a ni. Salman Khan pawh hian shooting neihna hmun tur London a pan tawh a ni.

Salman leh Priyanka te hi kum 10 vel liam ta khan film pahnih - Mujhse Shaadi Karogi leh Salaam-e-Ishqan-ahte an lo chang dun tawh a, an hlawhtling viau. Tun ṭuma a changdun leh tur pawh hi mi tam tain hmuh an chak tawh a, Bolly­wood titi pui ber a ni mek.

Indian film director lar Ali Abbas Zafar chuan Bharat film hi a siam dawn a, kum 37 mi lek la ni mah se sulhnu ṭha tak aneih avangin a ngehhlelhawm zual a ni. A film siam tawh zingah Sultan (2016) leh Tiger Zinda Hai (2017) te chu a lar zual an ni a, film dang eng emaw zat a siam tawh bawk. Nikum maia tihchhuah Tiger Zinda Hai phei hi chu a hit rem rem hle a, sum pawh a la lut hnem hle.