Vasundhara NE Women Enterprenuers Award dawng tur zingah Mizo pahnih

Vasundhara Northeast Women Entrepreneurs Award chu April 26 khian New Delhi-ah a ṭum li nan sem a ni dawn a, award dawng tur zingah Mizo hmeichhia pahnih an tel.

Vasundhara NE Wo­­men Enterprenuers Award hi hmarchhaka hmeichhia, mahnia into­delh leh eizawnna kawnga hlawhtlingte hnena pek ṭhin a ni. Tun ṭumah hian kum 2015-16 leh 2016-17 chhunga hemi kawnga hlawhtling thlanchhuah mi 17 te hnenah hlan a ni ang.

Chung zingah chuan Lunglei mi Zomawii Hrahsel leh Zonunsangi, Aizawl te pawh an tel. Zomawii hian Bakery hlawhting taka a kalpui avangin award hi a dawng dawn a, Zonunsangi pawh hian Handicraft-ah a dawng dawn bawk a ni.

Guwahati-a organi­sation pakhat Sreemanta Sankar Mission leh PHD Chamber of Commerce and Industry, DoNER Ministry leh Ministry of Skill Development and Enterprenuership ṭang­kawpte chuan award hi an sem ṭhin a ni. Award sem hi DoNER Minister Jitender Singh chuan a telpui dawn a ni.