Khawvel mi huhang ngah 100 zingah Deepika Padukone

Time magazine chuan kum­tina an tihchhuah ṭhin '100 Most Influential People' list chu Ningani khan a tichhuak leh ta a, Bollywood actress Deepika Padukone chu huhang ngah zual thlan chhuah zingah a tel.

Time magazine-in khawvela mi huhang ngah a thlan chhuahte hi mi chal lang tak tak an ni a, hei hian Deepika Padukone nep loh zia a pholang chiang hle. Bollywood bakah Hollywood thlenga hnuhma nei ṭha tak Deepika hi khawvel huapa huhang ngah ber ber thlan chuah zingah a tel avang hian Bolly­wood star-te tan pawh hmabak a eng hle a nih tih a tilang.

'xXx: Return of Xander Cage'-a a chanpui Vin Diesel chuan Deepika hi a fak hle a, "A ni hi chu mi bik a ni, India chauh a tihmingṭha a ni lo a, film khawvel tan chanchin lawmawm tak a ni"a ti.

Indian cricketer Virat Kohli pawh huhang ngah thlanchhuah zingah hian a tel a, Ola co-founder Bhavish Aggarwal pawh a lang. Indian chhul chhuak Microsoft CEO Satya Nadella pawh a lang bawk.

List-ah hian zaithiam lar - Kesha, Rihanna leh Cardi B bakah American singer Jennifer Lopez te pawh an tel. Film khawvela mi chal lang tak tak - Black Panther star Chadwick Boseman leh Nicole Kidman te pawh an lang. Prince Harry pawh a langsar zingah a tel a, a nupui tur American actress Meghan Markle pawh a tel bawk.

American comedian Tiffany Haddish pawh a langsar zingah a tel a, khawvela mi hausa bera puan Amazon CEO Jeff Bezos pawh a langsar viau bawk. Tennis player Roger Federer te, basketball player Kevin Durant leh gymnast Rachel Denhollander te pawh hming langsar an ni.

List-ah hian politician chal lang tak tak pawh an lang a, khawvel ram hruaitu hrawl tak tak an lang. US President Donald Trump leh president hlui Barack Obama bakah, North Korea president Kim Jong, Chinese President Xi Jinping, Prince Mohammed Bin Salman, Japanese Prime Minister Shinzo Abe leh Bangladesh PM Sheikh Hasina te hming a lang. Hetih lai hian India Prime Minister Narendra Modi hming a lang lo thung.