India ramah WW 1984 leh Tenet Engtikah nge kan en theih dawn?

Kumin chhunga film tlangzarh tawh zinga huhang ngah ber Tenet leh tlangzarh mai tur ngaihven hlawh tak Wonder Woman 1984-te chu India rama tlangzarh hun tur a hriat ve ta.

Tenet hi khawthlang leh khawchhak ram ṭhenkhatah chuan tlangzarh tawh mah se India ramah chuan theatre-te khar a la nih hlawm avangin an la tlangzarh ve lo a, December 4 hian ramchhunga theatre hrang hranga en theih turin tlangzarh a ni ve dawn ta.

US leh ram dangah chuan thla thum vel liam ta khan tlangzarh a ni tawh a, Warner Bros lam chuan karlehah India ramah pawh tlangzarh a ni ve dawn ta tih hi puangzarin Christopher Nolan-a film hi en theih a ni thuai dawn.

Wonder Woman 1984 chu US leh HBO Max-a tlangzarh niah tak India ramah pawh an tlangzarh ve dawn tih a chiang tawh a, Krismas present atan WW 1984 hi ramchhung theatre hrang hrangah en theihin a awm dawn a ni. Hetihlai hian streaming platform-ah erawh kan la en ve thei dawn lo a nih hmel a, Gal Gadot chevel en dun tan chuan theatre lam pan a ngaih hmel. Mizoram lama kan movie theatre neih ve angte erawh engtikah nge an inhawn dawn hriat a la ni lo a, state ṭhenkhat theatre hawn an phalnaah chuan heng film-te hi a en theih ṭep tawh a ni.

WW 1984 hi Belgium, Bulgaria, Egypt, Estonia, France leh ram dang eng emaw zatah chuan December 16-ah tlangzarh a ni dawn thung.