Ariana Grande hla thar 'No Tears Left to Cry'

'Dangerous Woman' hitmaker Ariana Grande chuan kum khat dawn hla thar a tichhuah loh hnuah nimin khan 'No Tears Left to Cry' a tichhuak a, ngaihven a hlawh hle.

Ariana Grande hian nikum May thla khan Man­chester-ah concert a nei a, hemi ṭum hian bomb a puak. He thil thlengah hian mi 22 an thi a, hliam tuar eng emaw zat an awm bawk. Pawikhawihna rapthak tak thlen hnu hian hla thar a la tichhuak leh lawk lo a, tunah erawh fan-te tan lawmna tur a awm ve leh ta. A hla thar 'No Tears Left To Cry' hi social media lamah chuan a lar leh tawh viau a, YouTube-ah pawh viewer an tam tawh hle. A video pawh a dangdai hle a, in chhawng sang tak tak chungah te a inthehṭhil vel a ni.

Ariana chuan hla thar a tichhuah tur thu hi kar tir lam khan a lo puang lawk tawh a, social media lamah pawh a tarlang bawk. Album pawh a buaipui mek a, Max Martin, Savan Kotecha leh Pharrell Williams te a thawhpui a ni.