'Khuavang Note' - Shin Bia

Hei le! Rpa Ralte leh Shin Bia an thawk dun e
Mizo ṭhalaite'n an duh rawn, Instagram leh YouTube lama ṭhalaite'n an chevel an en nasat em em Shin Bia chuan Rpa Ralte nen thawk dunin hla thar 'Khuavang Note' a rawn tichhuak dawn e.

A hla thupui han hriat mai pawh hian ama sak tur niawm tak a ni reng a, he hla hi music producer leh songwriter, Mizo artist lar ber pawl Rpa Ralte kut chhuak a ni.

Up beat pop lam hawi a ni dawn a, a satuin a zir bakah ṭhalaite rilrem zawng tak hla a ni dawn a, a 'hit' turah beisei ang.

Zanin hian Zonet Cable TV lamah a official music video tihchhuah a ni dawn a, YouTube lamah pawh duh hun huna hmeh chhuah theih turin a awm thuai dawn a ni.

Shin Bia belchiang ang
Shin Bia tia kan hriat lar hi a hming tak chu Shwe Oh a ni a, March 26, 1999-ah piangin tunah hian US lamah a khawsa mek. US-ah hian kum 10 zet chu an chhungkuain an khawsa tawh a ni.

Amah hi Laimi a ni a, zirna lamah pawh college graduate ni tawhin, Queens University of Charlotte aṭangin BA a zo a, Psychology major niin, a minor-ah Health Science a nei thung.

Social media lamah chuan Mizo ṭhalaite'n an 'follow'-na a rei tawh a, Vanlalsailova hla 'Thinlung a thlir zawk ṭhin e' tih leh Sangteii Khuptong-in thiam taka a sak 'Awm lo ta la' tih a 'cover'-te phei chuan YouTube lamah thlirtu nuai chuang fe a nei ve ve a ni.