007 thar tur ngaihtuah a la ni dawn lo

James Bond producer Barbara Broccoli leh Michael G. Wilson-te chuan kum 2022 hma chuan Daniel Craig thlaktu tur, 007 thar tur an la ngaihtuah rih dawn lo tih an sawi.

BBC Radio 4 Today program-a Thawhṭanni zinga an kawmnaah hemi chungchang hi James Bond producer-te hian an sawi chhuak a ni. Craig 007 thlaktu tur an ngaihtuah tawh em tia an zawhna chu,"Kan la ngaihtuah lo hrim hrim. Daniel hian a duh angin hun han hmang phawt se kan duh. Nakkum lamah kan ngaihtuah ṭan ang," tiin an sawi.

British spy film James Bond lemah hian Craig hi kum 15 lai a chang a, producer-te chuan 007 history-ah Craig chuan hmun pawimawh tak a chang reng tawh dawn tih an sawi bawk.

Daniel Craig-a James Bond film hnuhnung ber 'No Time to Die' chu October 8 hian US-ah tlangzarh a ni dawn a, he film siamna atan hian $mtd 250-300 vel zet an hmang a ni. Craig hi 'Casino Royale' (2006) aṭang khan 007 lemah hian a chang ṭan a, 'No Time to Die' hi a Bond film pangana a ni.