Swedish DJ Avicii thihnain music khawvel a barakhaih ; A thihchhan la puangzar lo

Swedish DJ superstar Avicii chu kar kalta Zirtawpni khan Muscat, Oman-ah thia hmuh a ni a, kum 28 mi thih thu hian music khawvel a barakhaih hle. Nimin thleng khan Avicii thih chhan hi puanzar a la ni lo.

Avicii thupuangtu Diana Baron chuan, "Avicii thih thu puan a ngai ta mai hi pawi kan ti tak zet a ni. A chhungte pawh an hrilh hai tak zet a, hun harsa tak an tawh avangin an mimal thil zahsak turin kan inngen a ni" tiin, thubelhchian dawl lo leh rintlak loh thehdarh lo turin a ngen. Baron chuan a thihchhan hi puan a la ni rih dawn lo niin a sawi bawk.

Hetih rual hian khawvel huapa musician larin Arab ram Oman a pan hi mi tak tak chuan mak tih a ni a, zawhna pawh a tam hle a ni. A chhung leh ṭhian hnaite chuan he hmunah hian chawlh hmangin a kal niin an sawi.

A thihdan hi Oman police-te chuan an chhui zui mek a, a thihnaah hian midang inrawlh an awm an hriat loh thu an sawi. Oman Royal Police chuan information hrang hrang an lakkhawm tawh thu an sawi rualin, a thih dan kimchang hi mipui hriatah puanzar a nih rih loh tur thu an tarlang.

Harris kam chhuak
A thihthu hian EDM chhung­kua a dengna hle a, British DJ Calvin Harris pawhin chanchin lungchhiat thlak a nih thu a sawi. Harris chuan, "Avicii hian talent ṭha tak a nei a, hmabak tih tur tam tak a la nei a ni. A thih thu kan hre ta mai hi a mak a, rilru a na tak zet a ni" tiin a DJ pui a ui thu a sawi. EDM artist Deadmau5 pawhin Avicii a ui thu leh a chhungte a tawrhpui thu a tarlang bawk.

One Direction member hlui Liam Payne chuan, "Chanchin lungchhiat thlak tak a ni. A talent a ropui a, khawvel chhuahsan turin a la naupang lutuk" tiin Avicii chungchang a sawi.

Zai a tawk
Avicii hian Billboard maga­zine hnenah tour a chawlhsan thu a sawi a, a la naupan avangin mi mak tih a ni. Mahse a hriselna dinhmunin a zir miau loh avangin khawvel hmun hrang hranga zin kual chu thil harsa a ni. Kum thum kal ta vel khan zai a ni a, hei vang hian tour pawh hi a chawlhsan a ni. Kum 2012 pawh khan pan­creatitis avangin damdawi-inah dahluh a lo ni tawh bawk.

Chawimawina
Avicii hian American Music Award eng emaw zat a lo dawng tawh a, Billboard music award pawh hlan a ni. EDM huanga a hnathawh ṭhat avangin MTV Europe Music award pawh hlan a lo ni tawh bawk. Kum 2014 World Cup official anthem 'We Will Find a Way' ah khan Carlos Santana leh Wyclef Jean te nen an thawkho a ni.

Avicii hian 'Wake Me Up' leh 'Hey Brother' avangin hriat a hlawh hle. A hriselna ṭhat tawk loh avangin kum 2016 khan tour a chawlhsan thu a puang a, rimawi khawvel erawh a chhuahsan chuang lo. Music ṭha tak tak a siam chhuak reng tho a, nikum pawh khan Billboard music award dawng thei tur zingah chhawpchhuah a ni.

Avicii hi a hming tak chu Tim Bergling a ni a, Electronic Dance Music (EDM) huangah chuan hriat hlawh ber pawl a ni. A bikin Europe-ah a lar zual a, festival leh dance club velah a che tla tam a, sum pawh a lalut hnem hle a ni.