NKorea-in missile leh nuclear enchhin hna titawp dawn
North Korea ram hotu lu ber, Kim Jong-un chuan kar kalta Inrinni khan an ramin missile leh nuclear a enchhin ṭhin chu tihtawp a ni dawn tih sawiin, nuclear ralthuam enchhinna hmunte pawh khar a tum tih a sawi.
Kim Jong-un chuan an ram nuclear ralthuam neih leh an theihnate an enchhin tawh avangin enchhin chhunzawm zel a a ngai tawh lo tih a sawi. Nuclear leh missile enchhin bakah, a tihchangtlun hna kalpui mek pawh chawlhsan vek a ni dawn tih a sawi a ni.
NKorea ram hotu thusawi hi ram hrang hrang hruaitute chuan lawmawm an tih thu an sawi a, US President Donald Trump chuan khawvel tana chanchin lawmawm tak a nih thu a sawi a, June thlaa Kim nena an inhmuh hun tur pawh a nghakhlel hle tih a sawi. South Korea pawhin hmasawnna ropui tak a ni, a ti.
South Korea President Moon Jae-in leh Kim te hian tunkar chung hian inbiakna neih an tum a, NKorea-in a missile leh nuclear program a tihtawp tur thu a puan pawh hi inbiakna neih dawn vang pawh hi a ni thei nia sawi a ni. US leh SKorea hian NKorea hi a nuclear program titawp turin an nawr reng a ni.
NKorea ram ṭhianṭha, China chuan Kim-a thutlukna siam chu lawmawm a tih thu sawiin, hei hian Korean peninsula boruak pawh a siamṭhat ngei a beisei thu a sawi. Russia foreign ministry pawhin thu lawmawm tak a ni tiin, US leh SKorea-te chu Korean peninsula-a an sipai dahte pawh titlem turin a phut zui nghal bawk.
Kim Jong-un hian nuclear ralthuam enchhinna hmunte khar a ni dawn tih sawi mah se, an ralthuam neihsa tihral a tum thu erawh a sawilang lo. NKorea hian ṭum eng eaw zat missile a lo enchhin tawh bawk a, heng zinga ṭhenkhat chu kahchhuah anih hnu lawkah a puak a, ṭhenkhat chu mel eng emaw zata thui a thlawh hnuah tuipuiah an tla a ni. NKorea-in nikum chhunga test a neih langsar zualte chu -
12 February 2017: Medium-range ballistic missile chu Banghyon air base aṭangin kahchhuah a ni a, km 500 vel a thlawh hnuah Sea of Japan-ah a tla.
4 July 2017: NKorea chuan hlawhtling takin a vawi khat nan intercontinental ballistic missile a enchhin thu a sawi. He missile hi km 2,802-a sangah minute 39 vel a thlawk a ni.
29 August 2017: NKorea chuan nuclear ralthuam phur thei ballistic missile chu a vawi khat nan a enchhin. Pyongyang bul aṭanga kahchhuah niin, km 550 vela thui thlawkin, Japan ram boruak chinah a thlawk lut a ni.
15 September 2017: A ṭum hnihna atan Japan kaltlangin ballistic missile a enchhin leh a, Hokkaido tuipuiah a tla. Km 770 vela sangah thlawkin km 3,700-a thui a thlawk.
29 November 2017: US ram pum kap pha thei tur intercontinental ballistic missile chi thar a enchhin thu NKorea chua a sawi. Hwasong-15 missile chu Japan ram tuipuiah a tla a, mahse missile dang a lo enchhin tawh aiin a thlawk sang thei zawk.