Mizo Kristian film thar HNEHTU October 2-ah Central KṬP YouTube channel leh Hruaina Eng-ah a en theih dawn

Mizo Kristian film thar 'Hnehtu' chu October 2, Inrinni zanah hian en theihin a awm dawn ta.

Hri leng vanga hun rei tak chhung tihchhuah theih a nih loh hnuah 'Hnehtu' film chu tihchhuah theih a ni dawn a, October 2 zan dar 8-ah hian Central KṬP YouTube channel leh Hruaina Eng-ah a duh apiang tana en theih turin tihchhuah a ni dawn.

‘Hnehtu’ Film hi Central KṬP produced a ni a, CKṬP hian Film eng emaw zat tichhuak tawh ṭhinin, Branch kutahte an dah tlangpui ṭhin. Tuna mi hi chu CKṬP-in ama puala film puitling a siam hmasak ber a ni a, budget pawh hi mizo film angah chuan a sang viau.

'Hnehtu' OST hi Isaac Hnamte leh Arini-te chuan lo tihchhuak tawhin, YouTube lamah thlira ngaihthlak theihin a awm reng tawh a ni

Director hi Lalnunsiama (One Vision Gospel Media) a ni a, 'Zalenna' film siamtu kha niin kha film pawh kha an website www.ovg.tv-ah en theih in a awm reng a ni.

‘Hnehtu’-ah hian a changtu an ṭha dawn a, Papuia Pachuau leh Siamtea ( Awmpui Pa )-te pawh kan hmu dawn a, tin, zaithiam Didiki leh '0389' lam aṭanga kan hmelhriat tawh Maruata Rawite te pawh kan hmu dawn a, a hmunnawm viau a rinawm.

A trailer phei chu kum khat chuang fe liam taah khan YouTube lamah hmuh tur a awm daih tawh a, trailer aṭang ringawt pawhin a hmuhnawm dawn tih a hriat.

Nikum lamah khan OST hmasa ber, Isaac Hnamte sak chu tihchhuah a lo ni tawh a, kar hmasa Zirtawpni khan Arini sak OST dang tihchhuah a ni leh bawk. Arini music video aṭang pawhin film ruangam eng emaw chen hmuh tur a awm a ni.

"Media hmanga rawngbawlna kawngah Kohhran ṭhalaite kan harh thar zel a, a bik takin tunlaiah 'visual media' hi Setana hmanraw pui berte zinga mi a ni awm e. He hmanrua vek hi Pathian ram zauhna atan a hman ṭangkai thiam a ṭul a ni," tiin Director Siama chuan a sawi.