G'nie leh K&P Record label-te'n inremna ziak

Kings & Prophets Record label chuan tunlai Mizo lengzem singer zinga huhang ngah ber pawl Benjamin Sum inremna an ziahpui hnuah Thawhṭanni khan Mizoram mai ni lo, hmarchhak pum huap pawha rapper lar ber pawl G'nie chu inremna an siampui leh ta.

K&P Record hian 'K.O.N.E' hitmaker hi Mizoram chauh ni lo, hmarchhak state dangah pawh hmalakpui an tum a, an hlawhtling a nih chuan Mizo artist-te tana sulsutu pawimawh tak pawh a nih theih a rinawm.

G'nie hi chu tunge a nih sawi nawn a ngai awm lo e. A music video eng emaw zar YouTube lama thlirtu maktaduai chuang nei thei, rap music hmasawnna atan theihtawp chhuahtu a ni. 'K.O.N.E' a tihchhuah hnuah phei kha chuan hmarchhak state hrang hranga rap music scene-ah chuan boruak a nei hat a nih kha.

K&P Record label hian artist eng emaw zat inremna an lo siampui tawh a, chung zingah chuan Andrew Laltlankima, Mami Varte leh Avora Records-te pawh an tel. Heng an artist-te hi album tihchhuahpui ngei an tum tih an sawi a, G'nie pawh hi album an tihchhuahpui mai thei a ni.