Jaui hla thar 'Min hmangaih rawh' a chhuak ta

Jaui chuan hla thar 'Min hmangaih rawh' a tichhuak.

'I hlutna' tih hla hmanga thiam taka Zofate min awitu Jaui chuan music video thar 'Min hmangaih rawh' chu kar tir lamah khan Zonet-ah tichhuakin, nizanah khan YouTube lamah a chhawp chhuak leh a ni.

He hla hi Hmachhuana Khiangte phuah a ni a, a phuahtu chuan,"He hla hi a thupui hian a khaikhawm kimin ka hria. A hla chang hian kan hmangaihte tana kan tha leh zung, rilru leh ngaihtuahna senga engkim a ṭha ber pek kan huam zia leh hreawmlai leh bawrhsawm lai pawha theihtawp kan chhuah chuan theih loh a awm lo a ni tih a tarlang.

"A thunawnah 'I Par zu ka dawnin' a tih hi inngaihzawnna leh nupa inkarah pawh a niang chu, kan duh berte nena, a nuam emaw a hreawm emaw pawh nise, huaisen taka kan tuar chhuah theihna hi a lo thlum (sweet) ber. Chu chuan a kawppui kha chhuang tak leh hmasawn zel tura duhsak chungin, amah theihnghilh mai loa vul zel tur leh hmangaih reng tura a ngenna hla a ni," tiin a sawi.

Music leh recording chu Hmachhuana Khiangte kut chhuak a ni a, Hope Music chuan mixing leh mastering an khawih a, video chu Remruata Bilywaif kut chhuak a ni thung.

Music video hmuh­nawm taka Jaui kawr hakte kha Teremi leh Lucus Hnamte-te kut chhuak a ni bawk.