Box Office ; A hmun ngaiah 'A Quiet Place' a kir

Thriller film 'A Quiet Place' chu sum lakluh tam lamah 'Rampage' chuan rawn khum zawk mah se, tunah chuan Box Office-ah roreltu a ni leh ta. Hetih lai hian China Box Office-ah chuan 'Rampage' a che ṭha a, sum hailut hnem ber a ni.

Tun thla tira tlangzarh 'A Quiet Place' hian kar liamta chhung khan US-ah ringawt $mtd 22 a laut a, No. 1 a hauh. He dinhmun hi tlangzarh tirh khan a lo luah tawh a, Rampage hian a rawn luahlan. Mahse tunah chuan a hmun ngaiah a kir leh tawh a, en a hlawh zui zel.

Hetih rual hian Dwayne 'The Rock' Johnson channa Rampage chu sum lalut tam pahnihna niin, $mtd 21 a lalut. China aṭanga a sum lakluh pawh $mtd 27.4 niin, US-ah aiin a sum lakluh a tam zawk. April 13-a tlangzarh Science fiction film hian khawel hmun hrang hrang aṭangin $mtd 283.3 zet a lalut tawh a ni.

Comedy film chhuak thar I Feel Pretty chuan $mtd 16 lalutin, sum lalut tam pathumna a ni. Super Troopers 2 leh Truth or Dare-te chuan dawtin, $mtd 14.7 leh $mtd 7.7 an thawkchhuak. Ready Player One chu sum lalut tam parukna niin, $mtd 7.4 lai a la lalut bawk.

Box Office-a pakhatna hun rei tak chhung luah thei Black Panther chu top 10-ah a lang leh bawk a, kar liamta chhung khan $mtd 4.9 lai a huilut ve leh. Black Panther sum lakluh hi tlahniam viau tawh mahse, a sum lakluh tawh zawng zawng hi $mtd 681 zet a tlin tawh avangin dah hniam theih a ni lo. January thlaa tlangzarh superhero film hi kumina film chhuak tawh zingah chuan sum lakluh kawngah a la che ṭha ber a ni.