May 25-ah Laltheri film tlangzarh dawn

Kuminah Mizo film chhuak thar a la tam lo a, thla thar lam erawh beisei tur a awm dawn. Sailo lal, Lalsavunga fanu Lalchawngpuii chanchin beh­chhana siam 'Laltheri' tih chu May 25 khian tlangzarh a ni dawn.

Cheng nuai riat vel senna film hi Aizawl-ah tlangzarh a ni dawn a, hmun hrang hrangah chhuah a ni ang. He film-ah hian Lalchawngpuii (Laltheri tia an koh bawk) chanchin ngaihnawm tak tarlan a ni a, a nulat vanglai chanchin te, hnamchawm tlangval Chalthanga nena an inngaihzawn dan te a ni. Laltheri'n hmangaihna a laknat dan te, Chalthanga a neih ngei theih nana a beih dan leh thah sak a ni leh si avanga a tawrhna te tihlan a ni.

Film-ah hian kan pi leh pute hunlaia pasalṭha te inpekna leh huaisenna te, khawtlang tana an rinawmnna leh hlutna te tarlan a nih rualin, mi verther te avanga harsatna thleng ṭhin pawh tihlan a ni. Hei bakah hian lal sutpui vawn hi engnge ni tih te chu he film-ah hian hmuh theihin a awm dawn bawk.

'Laltheri' film hi thla kaw chhung vel buaipui a ni a, C.Hming­thangvunga chuan a direct a ni. Photography leh editing hi H.Lalchhuanawma (Anna) chuan a khawih a, Louis Hauhnar chu co-producer a ni. Original Soundtrack hi C.Bawiha, Kyusho-Waza buatsaih a ni thung.

Laltheri film hi veng hrang hrangah chhuah theih tura ruahman niin, online hmanga en theih tura duan a ni bawk. Sumtuak nana hmang duh tan heng numbert - 9862362668/9402312446-ah te hian booking tih theih a ni.