'Avengers: Infinity War' tlangzarh a ni dawn ta ; Box Office-ah record a siam beisei

Kumina film chhuak tur zinga thawm nei lian ber tih ngam 'Avengers: Infinity War' chu vawiin hian tlangzarh a ni dawn a, thawm a nei lian hle. Tlangzarh hma hauh aṭanga mi ngaihven hlawh he fantasy film hian Box Office-a sum lakluh tam lamah record a siam beiseina a sang hle.

Hollywood super star rual - Robert Downey Jr, Chris Evans, Tom Holland, Chris Hemsworth leh Scarlett Johansson te channa film hian ngaihven a hlawh hi a mak lo a, beiseina pawh a sang hle. A film rei zawng hi darkar hnih leh minute 29 a ni dawn a, en manhla tur tak a ni. Khawthlang media te chuan he fantasy film hi an vaw hot nasa tawh hle.

He film siam nana an sum sen ral pawh hi a turu hle a, a changtu turte pawh khawvel huapa a ber kai pha ṭhah an ni. Film director lar Anthony leh Joe Russo te kutchhuak a nih avangin en a chakawm zual a ni. Marvel Cinematic Universe chuan an tichhuak dawn a, sum lakluh tam lamah record a siam ngei an beisei.

Tlangzarh a nih hma hauh hian record a siam der tawh a, pre-ticket sale-ah kumina film chhuak tawhte a huam vek. Kumina film chhuak hit ber pawl Black Panther pawh a khum a, sum lakluh kawngah pawh a khum theih beisei a ni. Pre-ticket sale-a a chet ṭhat avang hian a hit hle tura ngaih a ni.

Chhut lawktute chuan Marvel movie chhuak thar tur hian tlangzarh karah $mtd 250 vel a lakluh theih an ring. Hei hi US-ah bik chauh a la ni zui a, khawvel hmun dang aṭanga a suml akluh tur nen chuan a sang viau dawn. An beisei a phak a nih chuan US bika film tlangzarh tawh zinga kar khat chhunga sum lalut tam ber a ni ang.

US Box Office-a tlangzarh kara sum lalut hnem ber chu kum 2015-a tichhuah 'Star Wars: The Force Awakens' niin, $mtd 247.96 a lalut. Hei hi 'Avengers: Infinity War' hian a khum theih an ring a ni.