Total Guitar greatest rock guitarist of all time Brian May

Kumin kumtir lam khan guitar magazine lar Total Guitar chuan an magazine chhiartute chu rock guitarist-a an duh ber vote turin an ti a, chhiartute chuan Queen guitarist Brian May chu 'greatest rock guitarist of all time'-ah an thlang ta a ni.

Queen legend Brian May chanchin hi chu sawi zau vak a ngai tawh chuang awm lo e, rock music leh rimawi lama tui hrim hrim zingah chuan a chanchin hi hre loa bar an awm tawh awm lo ang. Guitarist ṭha a nihzia kan hre tlang tawh a, a mizia, music bakah thildangah pawh thiamna a neihsan zia chu vawi tam tihchhuah a ni tawh.

Hmanni lawkah khan heart attack avangin Brian May hi khawvelin a chan ṭep a nih kha, mahse tun atan chuan a dinhmun a ṭha leh tawh a, a hriselna pawh ngaih­tuah­awmah a awm lo niin a lang.

Total Guitar magazine hian an issue tihchhuah thar berah May an interview-na hi an tichhuak nghal bawk a, Queen guitarist ngaisangtute tan chuan chhiar manhla tak pawh a ni ngei ang. Wikipedia lama lang lem lo, guitarist ropui dangte a hmuhdan a sawi chhuak a ni.

"Sawi tur ka hre lo a. Awmdan tur pawh ka thiam lo zawk. Ka beisei phak bak a ni. Miin hetianga min lo ngai hian thuk takin min khawih a ni. Dawi atin ka awm si lo, a nihna takah chuan guitarist ropuite huanga ka awm ringawt pawh hi ropui ka ti. Ni e, ka thil lo tihte khan mi nunah nghawng a nei ve a nia nge, chu chu ka tan chuan a thil hlu tak a ni. Guitarist ropuiah hian ka inchhal ngai lo. Ka thinlung chhungril aṭangin ka play ṭhin, chu zawng chu a nimai," tiin a din­hmun chu phu lo a intih thu a sawi.

Ni e, guitarist ṭha thlangtu tam tak pawhin Jimi Hendrx hi an dah sang a, guitarist ṭha bera chhaltu pawh a ngah hle. Tun ṭumah erawh Total Guitar chhiartute vote lak a ni a, Hendrix hian a tluk zo ta lo a ni.

"Jimi hi ka tan chuan number one a ni. Ka sawi fo ṭhin chu, keimahah chuan, superhuman a la ni tho. Alien planet aṭanga lokal tak tak a ang zawk hial a, engtin nge a tih theih angte kha a tih ka hre lo. Jimi hnen aṭang hian zirtur ka nei reng a, tunah hi chuan a rimawite ka play khat tawh hle nachungin ka chhungrilah hian a bet reng a ni," a ti.

Total Guitar-in Jimmy Page chungchanga a ngaihdan an zawhnaah Brian May chuan chhuan khat deuh thaw an nih thu leh, Page chu anni ai chuan a upa hret thung tih a sawi.

"Primary school pakhatah kan kal ho ṭhin a, keini ai chuan pawl hnih thumin a sang zawkin ka hria. Ka ngaisang reng ṭhin a, ka tan chuan tualchhung naupang ang a ni a. Kan chenna pawh a inhlat lo. Ka tan chuan 'master of invention' a ni.

Zeppelin album-te hi ka ngaithla ning ngai lo a, ka ning ngai bawk hek lo ang," a ti a  ni.

Brian May hi Rolling Stone '100 Greatest Guitarists of All Time'-ah No.26 a ni a, kum 2012 khan Guitar World magazine chhiartute chuan guitarist ṭha ber dawttuah an thlang tawh bawk. Rock and Roll Hall of Famer a ni a,  Grammy Lifetime Achievement Award pawh kum 2018 khan a dawng tawh bawk a ni.

1.    Brian May

2.    Jimi Hendrix

3.    Jimmy Page

4.    Eddie Van Halen

5.    Eric Clapton