Shang-Chi rorelna a tawp thei lo

Box Office-ah 'Shang-Chi and the Legend of the Ten Rings' bawkin ro a rel leh a, film thar ngaihven hlawh 'Dear Evan Hansen' nek chhuah atan chuan Shang-Chi hi a la chak mah mah a ni.

Shang-Chi sum lakluh a tam tawh
'Shang-Chi and the Legend of the Ten Rings' hi kar li liam ta khan North America-a theatre 3,952-ah tihchhuah a ni a, tlangzarh a nih aṭangin kar thum lai liam tawh mah se $13,031,411 lai sum a lalut tawh.

MCU phase 4 film hi a hit zel a, North America Box Office aṭang ringawtin $197,151,684 zet sum a lalut tawh a, ram dang aṭangin $167,176,526 lalut tawh bawkin khawvel ram hrang hrang Box Office aṭanga a sum lakluh belhkhawm chu $364,328,210 a ni hem tawh a, kumin chhunga North America theatre ticket hralhna aṭanga film sum lalut tam ber a ni.

Shang-Chi hian kumin chhunga film sum lalut tam zual pahnih 'F9' leh MCU film tho 'Black Widow' chu North America theatre aṭanga sum lakluh tam lamah a khum tawh.

North America Box Office-ah hian kar li chhung ro a rel tawh a, musical film thawm nei ring angreng tak 'Dear Evan Hansen' chuan a la nek chhuak zo lo deuh a ni.

'Shang-Chi and the Legend of the Ten Rings' hi kumin chhunga North America Box Office aṭanga sum lalut tam ber a ni tawh

'Dear Evan Hansen' chu
2015 stage musical, 'Dear Evan Hansen' tih tho behchhana musical teen drama film siam 'Dear Evan Hansen' chu kar tawp liam ta chhung khan theatre 3,364-ah tihchhuah a ni a, $7,443,830 a lalut, pahnihna a ni.

Ben Platt leh Kaitlyn Dever-te channa film hian sawisel a hlawh nasa angreng a, Rotten Tomatoes-ah phei chuan rating 4.9/10 chiah a hmu.

Ryan Reynolds channa 'Free Guy' chu pathumna a la ni phak a, horror film 'Candyman' chu palina niin kar hmasa lama pathumna 'Cry Macho' chu pangana a ni thung.

Film thar, film thar
Box Office Mojo chart-ah film 49 tarlan a ni a, chung zingah chuan film thar pathum chiah a awm. 'Dear Evan Hansen' bakah hian 10-na 'Love Story' leh 25-na 'I'm Your Man'-te chu film thar an ni bawk.

US pawn lamah Dune
October 22-a US-a tlangzarh chauh tura ruahman, 'Dune' pawh a hlawhtling zel a, $mtd 77.8 chuang sum a lalut tawh a ni.

Timothée Chalamet, Rebecca Ferguson, Oscar Isaac, Josh Brolin, Stellan Skarsgård, Dave Bautista, Stephen McKinley Henderson, Zendaya, David Dastmalchian, Chang Chen, Sharon Duncan-Brewster, Charlotte Rampling, Jason Momoa, leh Javier Bardem-te channa Science fiction film 'Dune' hi US-a tlangzarh a nih rualin HBO Max lamah pawh en turin an chhawp chhuak dawn.