Billboard Latin Music Award Daddy Yankee - Luis Fonsi - Shakira an langsar

Kum tina sem ṭhin Billboard Latin Music Award chu Ningani khan sem a ni leh ta a, award pariat zet dawngtu Daddy Yankee chu mi mala langsar ber a ni.

Ani bakah hian Luis Fonsi, Shakira, Justin Bieber leh Ozuna te chu award dawng hnem zual an ni.

Award hi Mandalay Bay Events Center, Las Vegas-ah sem a ni a, Gaby Espino leh Marco Antonio Regil ten an host. Kum 2017 chhunga hla lar ber tih ngam 'Des­pa­cito' chu a che ṭha leh pek hle a, he hla satute pawhin award an dawn hnem phah hle. 'Despacito' hian award paruk zet a hui a, Daddy Yankee, Luis Fonsi leh Justin Bie­ber te tan malsawmna a ni.

Award ngaihlut hlawh tak tak - Airplay Song of the Year, Digital Song of the Year, Streaming Song of the Year, Hot Latin Song of the Year leh Vocal Event, Latin Pop Song of the Year-te chu a hui vek a ni.

Luis Fonsi, Daddy Yankee leh Justin Bieber te sak 'Despacito' hi a hit takzet a, award dawn zat aṭang ringawt pawhin sawi nep theih a nih loh zia a lang zel. He hla avang hian Yankee chuan Latin Rhythm Artist of the Year, Solo leh Songwriter of the Year award-te a dawng bawk.

Luis Fonsi leh Justin Bieber te pawhin award pasarih zet an humhaw. Bieber hi Crossover Artist of the Year atana thlan niin, Fonsi, pawhin Hot Latin Songs Artist of the Year award a dawng bawk. Luis Fonsi hi a perform a, Demi Lovato nena an hla hit 'Echame la Culpa' a sak laiin mipui thawm a ṭha hle.

Shakira a vul
Colombian singer Shakira hi kum 41 mi lai ni ve tawh mah se, music huangah chuan a la chuai lo. Billboard Latin Music Award-ah chawimawina pali zet a humhaw a, nikum May thlaa a tlangzarh 'El Dorado' chu Latin Pop Album of the Year atan thlan a ni. Hot Latin Songs Artist of the Year leh Top Latin Albums Artist of the Year atan thlan a ni a, Latin Pop Artist of the Year (Solo) award hlan a ni bawk.

Artist of the Year award chu Ozuna kutah hlan niin, New Artist of the Year atan Christian Nodal thlan a ni. Tour of the Year award chu Enrique Iglesias leh Pitbull ten an dawng a, Maluma chuan Social Artist of the Year award a dawng bawk.