Mizoram Youth Commission hmalaknain Jet Airways cabin crew-ah Mizo nula panga an tling

India rama international airline ṭhang duang ber pawl Jet Airways-a cabin crew hna thawk turin Mizo nula panga an tling thar.

Tun hnai khan Mizoram Youth Commission Office, New Secretarit Complex-ah Jet Airways cabin crew interview final round hi neih a ni a, final round thleng pha mi 12 zing aṭangin mi 5 an tling a ni. Tling tharte hian medical fitness certificate leh police verification an tihfel hnuah Jet Airways Academy, Mumbai-ah training an zawm dawn a ni.

Jet Airways hotu pahnih - Kau­shik Shah, Human Resource Manager, Kolkata leh Vikram Bhat, Base Manager, Chennai te chu Aizawl-ah lo kalin, interview final round hi an telpui a ni.

Jet Airways cabin crew recruitment hi August emaw September thla hian Mizoram Youth Commission Office, Aizawl-ah neih leh tum a ni bawk.