Kimkima 'Hmangaihna Rimawi' ri a mawi

Mizo lengzem singer zinga huhang ngah ber pawl, zaithiam avanga award ṭhahnem tak dawng tawhtu Kimkima chuan nizanah khan Zonet-ah music video thar 'Hmangaihna Rimawi' a tichhuak.

Kimkima hla thar hi a mawiin, ngaihthlak a manhla a, a hla dang ang bawkin a sak mawi chi tak, hla lungkuai tak a ni.

Music video ringawt pawh sawi tham a ni. Ruben Lalmalsawma direct bawk a ni leh a, chumi avang chuan a hmuhnawm lo thei lo a ni tawp. Video awmze nei tak, dress code, leh an hmanraw chelek mai bakah a thawnthu kalhmang thlengin 'classic' tak a ni a, a hla a mawi piah lamah mit pawh a tlai viau.

Reuben-a hian music video hi a direct bakah editing pawh a khawih nghal a, Cassettes, Fiona leh Grace 10:45-te pawh lo thawhpui tawhtu Reuben-a kut chhuak hi hmuh a nuam leh viau mai. Music leh recording chu Thawngbawiha kut chhuak ni thungin Director of Photography chu Zuala Langel a ni.

'Hmangaihna Rimawi' hi YouTube lamah pawh thlira ngaihthlak tur a awm thuai dawn a, Kimkima hla dang ang bawkin thirtu an tam leh viau a rinawm.