Zaii Hauchhum 'Ka u Liandova' zaninah YouTube-ah

'Nghilh har di hmasa' hmanga thiam tak maia Zofate min awitu Zaii Hauchhum music video thar 'Ka u Liandova' chu zanin aṭangin MDM YouTube channel lamah duh hun huna hmeh chhuah theihin a awm dawn ta.

Zaii chuan, "He hla, 'Ka U Liandova' hi ka nunkawng behchhan a phuah ka ni a, ka U Sentea hriat reng nana phuah ka ni.

"Kan unau chanchin hi Liandova te unau thawnthuah hian a in zep tel vea ka hriat avang a he hla hi rawn phuah chhuak a sa ka ni. Kan hriat angin Liandova te unau inhmangaihna thuk zia, harsatna tinreng kara a kam chuan loh zia kan hria. Unau nei zawng zawngte'n an hmangaihte chibai buk nan leh kan Mizo thawnthu hlu tak Liandova te unau thawnthu chhawm nun a nih zel theihnan ka tih niin, mi zawng zawng tan he hla hi ka hlan e," tiin Zaii chuan a hla thar chungchang hi Vanglaini a hrilh.

'Ka U Liandova' hi kar hmasa lamah khan a lyric video YouTube-ah hmuh tur a awm tawh a, thlirtu nuai chuang an awm der tawh. Zonet lamah pawh he hla hi Thawhlehni zanah khan a tichhuak tawh a ni.