Yamaha R15 V4 & R15M Mizoramah lei tur a awm ta

Mizo ṭhalai tam takin an nghahhlelh, Yamaha R15 V4 leh Yamaha R15M chu Thansanga & Sons Auto Division, Ramhlun North-ah nimin khan tlangzarh a ni a, RayZR 125 Fi Hybrid pawh an tlangzarh nghal bawk.

Vanlalmuana, Info Bikes chuan heng two-wheeler tlangzarh tharte chungchang hi sawifiahin."R15 hi Mizorama bike game changer," a ni tiin a sawi.

"Tuna rawn chhuak thar R15 V4 leh R15M -te hi a landan V3 aiin a danglam nasain. a 'fairing' an khawih danglam tih a sawi. Driving Light a neih bakah a hmasa lama kan hmuh tawh ho aiin a headlight a eng zawk a, a eng a darh zau bawk.

"USD fork hi a danglamna langsar a ni a, V3 nen a engine eng emaw chenah a inṭawm thung," a ti.

Quick shifter awm chu a danglamna langsar a ni bawk tih sawiin, one direction quick shifter a ni thung. Mahse hei hi R15M-ah leh V4 pawl-ah chiah a awm a, 20 km/h chinah a hman theih.

Chetsualna veng turin 'Traction control' a awm tih sawi bawkin Yamaha R1M leh R6-te entawn deuhin bike design chu an siam nia a lan thu a sawi a, M leh V4 series hi a fork chhin a inan loh bakah a tanky-a logo inang lote chu a danglamna langsar a ni, tiin Vanlalmuana chuan a sawi.

Yamaha Aizawlah hian RayZR 125 Fi Hybrid pawh tlangzarh a ni a, hei hi smart motor generator nei, RayZR scooter hmasa ho aia petrol heh lo zawk a ni a, side stand kill switch-te pawh a awm thlap tawh a ni.

Thansanga & Sons Auto Division hi hmarchhaka R15 V4 dawng hmasa ber leh dawng tam ber niin tunah hian servicing centre lam tihchangtlun lehzual tumin hmundangah ram an lei a, hma an la mek a ni.

Yamaha R15M leh R15 V4 hi Rs. 2,01,917 leh Rs. 1,90,474 man inkar a ni a, RayZR 125 Fi Hybrid hi Rs. 86,420 (ex-showroom price) man a ni thung.