Pepsi Super Bowl LVI Halftime Show-a inlan turte an hrawl

Pepsi Super Bowl LVI Halftime Show-a inlan turte a hriat ta a, ram music ngainatute tan phei chuan nakkum Super Bowl Halftime hi a nghahhlelhawm tawh viau ang.

Super Bowl LVI Halftime Show February 13, 2022-ah chuan Dr. Dre, Snoop Dogg, Eminem, Mary J. Blige leh Kendrick Lamar-te laitual an chhir ho dawn. Anni panga hi a rualin stage khatah an la ding ho ngai loa, nakkum February thlaah erawh SoFi Stadium, Inglewood, California-ah a rualin superstar pangate hi an inlan ho dawn a ni.

NFL, Pepsi leh Roc Nation-in an buatsaih Halftime show-a inlan tur Dr Dre chuan a phur tawh thu sawiin Super Bowl Halftime show-a a inlan thei tur chu a career-a nuam a tihber tur leh phurawm a tihber tur zinga mi a nih thu a sawi. " JAY-Z, Roc Nation, NFL leh Pepsi hnenah lawmthu ka sawi a, Snoop Dogg, Eminem, Mary J. Blige leh Kendrick Lamar-te pawhin chu hun theihnghilh theih tawh loh tura min zawm ve dawn avangin an chungah lawmthu ka sawi bawk," a ti.

A inlan puitur artist palite tan hian Dre hi mi pawimawh tak a ni a, an hla leh album eng emaw zat a produce sak vek a ni. Snoop Dogg debut album Doggystyle kha Dre produce hi a ni a, tin, an vai hian Dr. Dre album-ah an tel vek tawh bawk.