Scarlett Johansson leh Disney an inrem

Disney Plus streaming platform lama 'Black Widow' pek chhuah avanga inhmuthiam lo Scarlett Johansson leh Disney-te chu an inrem ta.

An inremna thu leh hla tak erawh puanzar a la ni lo a, amaherawhcu Johansson hian Disney lak aṭang hian $maktaduai 50 a phût tih erawh a hmain sawilan a ni tawh thung.

Johansson chuan Ningani khan thuchhuah siamin Disney nena an inkar buaina chinfel a ni thei chu lawmawm a tih thu sawiin,"Kum eng emaw zat liam ta chhunga kan thawhhona ropui tak kha ka chhuang hle a, kum lo awm leh zel turah pawh kan thawhho zel ka beisei," a ti.

Disney Studios Content chairman Alan Bergman pawhin an buaina an chingfel thei chu lawmawm a tih thu sawi ve bawkin Marvel Cinematic Universe-a Scarlett Johansson hnathawh chu lawmawm a tih thu leh thawhho leh hlan a nghakhlel tawh tih a sawi a ni.

Scarlett Johansson hian thla hnih vel liam taah khan Disney Plus-a 'Black Widow' chhuah a nih kha an inremnaah a tel lo tih sawiin Disney lakah hian thubuai a thehlut a, streaming platform lama chhuah a nih avang hian pawisa maktaduai tam tak a chan niin a sawi.

'Black Widow' hi July 9-ah khan US-ah tlangzarh niin, theatre-ah leh Disney plus-a en theih tura tlangzarh rual niin, hrileng kara tlangzarh mah ni se a hlawhtling hle. Tunah hian ram hrang hrang box office aṭangin $mtd 378.8 a lalut tawh a, kumin chhunga film sum lalut tam pangana a ni phak.