ShiRock band competition-a pakhatna REVERSE TRAGEDY
Manipur sorkarin kum tina a buatsaih ṭhin, Shirui Lily Festival-a ShiRock band competition-ah Mizoram rock band Reverse Tragedy chu pakhatna an ni a, lawmman Rs. 10,00,000 an dawng.
ShiRock band competition-ah hian Mizoram aṭangin band pathum an tel a, Avora Records chuan lawmman pahnihna lain, Frisky Pints bassist Sangkima chu Best Bassist atan thlan a ni. Mizoram aṭanga tel te an che ṭha a, lawm pawh an hlawh hle.
Reverse Tragedy hian he competion atan hian The Prophets vocalist Ronnie Lalrinmawia chu vocalist atan an hmang a, an hlawhtlinpui. Aw ṭha chungchuang tak nei Ronnie leh band member-te combination a ṭha a, hei hi an hlawhtlinna pakhat pawh a ni.
Tun hnaia band ṭhang duang ber pawl Avora Records pawh an che ṭha a, lawmman an hum haw. Hetihlai hian pahnihna hi band pahnih an awm a, Ambush Records leh Avora Records te hian Rs 5,00,000 an insem a ngaih phah a ni. Nikum lama Hornbill Festival-a pakhatna lo ni tawh Avora Records te dahhniam theih an ni lo a, Frisky Pints pawhin mimal lawmman an la lak avangin kutruakin an haw bik lo.
Reverse Tragedy chu
An band hming aṭang renga bengver Reverse Tragedy hi band ṭhang duang leh hriat hlawh chho tak an ni a, competition hrang hrangah pawh hlawhtlinna an lo chang nual tawh. Kum 2014 khan Silchar-a NIT-ah India ram pum huap beat contest a awm a, hemi ṭum hian pakhatna an ni. Kum 2015 khan IIT Guwahati-in India rama University hrang hrangte intihlimna Alcheringa a buatsaihah telin, Rock O Phonix beat contest-ah lawmman pakhatna an lo la tawh bawk.
Hemi kum vek hian Hornbill International Rock Contest, Kohima-ah pakhatna niin, Rs 1,00,000 an lo hawn tawh bawk.
Shirui Lily Festival-a tel tur hian an inbuatsaih leh a, Guwahati-a prelim neih an paltlang hnuin Manipur hi an pan ta a ni. Intihsiak hi April 26-27 chhung khan neih niin, hla pathum ṭheuh an sak hnuah a che ṭha berah an ṭang ta a ni. Mimal lawmman la lo mah se band member-te thawhhona a ṭha a, phu takin lawmman pakhatna an hawn thei a ni.
Manipur sorkar-a Tourism department chuan Shirui Lily Festival hi kumtin a buatsaih ṭhin a, kuminah pawh hlawhtling taka buatsaih leh a ni. ShiRock band competition bikah hian sum a tam a, band tel pawh an ṭhahnem hle. Prelim-ah hian band 80 vel an inlan a, band 20-ten fiahna an paltlang a ni.
Shirock band competition hi American heavy metal band Queensrÿche chuan an khuhhawng a, Reverse Tragedy te hian an open sak nghe nghe a ni.